1 मिनु लोव़ शेंने थुम्‍शा, मेकेर रे लशा, कापेरनाउम सहरम जाक्‍दीम्‍माक्‍त। 2 मेकेर रोमी कप्‍तान का बाक्‍माक्‍त। मेको आ दाक्‍शो वाइल का रोइ पा बेक्‍चशो बाक्‍माक्‍त। 3 मिनु मेको कप्‍तानमी येसु आ पर्बम लोव़ पशो नेंशा, यहूदी आन जोक्‍ब तुइक्‍ब खाल्‍पा आन कली येसु ब्रथ सोइक्‍तीमी बाक्‍त। मेको आन कली “येसु एक पिशा, ‘आं वाइल कली सापतीन’ दे पुनीने” देंमाक्‍त। 4 मिनु मेकोपुकी येसु आ बाक्‍तीकेम जाक्‍शा, येसु कली “मेको कप्‍तान कली वारच पचा कली शिरशो बाक्‍ब। 5 मारदे हना मेकोमी यहूदी इं कली दाक्‍ब। मिनु इं ग्रुम्‍तीक खिं यो सेल्‍पाइक्‍तु” दे येसु कली देंमा बाक्‍त। 6 मिनु येसु मेकोपुकी नु लमाक्‍त। मिनु कप्‍तान आ खिं आ नेक्‍था जाक्‍दीम्‍मेनु, कप्‍तानमी आ वारच आन कली येसु कली लोव़ पथ सोइक्‍ता बाक्‍त। मेकोपुकीमी येसु कली “प्रभु, श्‍येत मपने। गो इन कली आं खिंम ओंइचा मशिरनुङ। 7 मोपतीके गो इन कली ग्रुम्‍थ मपिङ। गे सापाइक्‍तीक लोव़ का ला पने। मिनु आं वाइल साब। 8 गो यो अधिकार पाइश्‍शो मुर बाक्‍नुङ। लडाइ पाइबपुकीम आं कली टी‍नीम। गो का कली ‘लावो’ देंती हना, मेको लाइब। मिनु अर्को कली ‘पिवो’ देंती हना, पीब। आं वाइल कली ‘मेको गेय पावो’ देंती हना, मेकोमी पाइब” दे माइक्‍थ सोइक्‍ता बाक्‍त। 9 मिनु येसुमी मेको लोव़ नेंशा छक लाक्‍माक्‍त। मिनु आ नोले खोइक्‍ब आन कली हिरशा कोव़शा “गो इस्राएली आन दातेमी मेको कप्‍तान खोदेंशो थमा सुइक्‍ब मुर सुइ मतङमी” देंमाक्‍त। 10 मिनु मेको सोइश्‍शो मुर खिं लेश्‍शा जाक्‍मानु, वाइल साने थुम्‍शो तामे बाक्‍त।

11 इच्‍का नाक्‍त नोले येसु नाइन सहर गे लमाक्‍त। आ शेंसीबपुकी नु शुश मुर यो मेको नु लमा बाक्‍त। 12 मिनु सहर ङा ठेयब लाप्‍चो आ नेक्‍था जाक्‍दीम्‍मानु, मुरपुकीमी बेक्‍शो मुर का कुरशा पि‍शो तामे बाक्‍त। मेको वोंइश बेक्‍शो मीश मुर आ कांइचीक तौ बाक्‍माक्‍त। मेको मीश मुर नु सहर ङा शुश मुर मलामी लशो बाक्‍मा बाक्‍त। 13 मिनु येसुमी मेको कली तशा, शिशी पा “मङाक्‍को” देंमाक्‍त। 14 मिनु बेक्‍शो मुर कुरशो पला थिवानु, कुरबपुकी ख्रा दिक्‍मा बाक्‍त। मिनु मेकोमी “ए ठिटा, गो इ कली सेंसीशा बोक्‍को देंनुङ” देंमाक्‍त। मर्कूस ५:४१ 15 मिनु बेक्‍शो मुर बोक्‍शा निश्‍शा, लोव़ पचा गोवा बाक्‍त। मोपा सेंपाइश्‍शा, आ ममा कली गेवा बाक्‍त। १राजा १७:२३; २राजा ४:३६ 16 मिनु मुरपुकी मोदेंशो दुम्‍शो तशा, हिंमा बाक्‍त। मिनु मेकोपुकीमी परमप्रभु यावे कली ठेयब सेल्‍शा “इं दातेमी परमप्रभु यावे आ लोव़ पा छक लाक्‍चा ङा गेय पाइब का ग्रूमाक्‍त। परमप्रभु यावेम इं कली थमा पा शिशी पाइक्‍बाक्‍त” देंमा बाक्‍त। मत्ती १६:१४; लूका १:६८ 17 मिनु यहूदीया नु एर ओंथ ङा रागी नेल्‍लेमी मेको लोव़ ब्रमाक्‍त।

18 मिनु यूहन्‍ना आ शेंसीबपुकीमी यो मेको लोव़ नेंशा, यूहन्‍ना कली शेंदमे बाक्‍त। मिनु यूहन्‍नामी आ शेंसीब निक्‍शी आस कली ब्रेश्‍शा 19 “जाक्‍चा माल्‍शो गेन ननी देय अर्को आ लां कोव़क? दे प्रभु कली हिल्‍लो पथ लसे” दे सोइक्‍तीम्‍सी बाक्‍त। 20 मिनु मेको निक्‍शी येसु आ बाक्‍तीके जाक्‍शा “ब्‍वाक्‍कुम ख्रुम्‍शा ग्रुंइब यूहन्‍नामी सोइश्‍शो मुर नस्‍कु। जाक्‍चा माल्‍शो गेन ननी देय अर्को आ लां कोव़क? दे हिल्‍लो पथ सोइक्‍ताक्‍स्‍की” देंसा बाक्‍त। 21 मेको निक्‍शी जाक्‍सानु, येसुमी शुश रोइ पाइब मुर आन कली सापाइक्‍ना पाइक्‍न बाक्‍शो बाक्‍माक्‍त। बेक्‍चा ङा रोइ पशो, वोलम सुम्‍शो मुर आन वोल खेरना खेरन बाक्‍माक्‍त। मिक्‍च मताइब आन कली मिक्‍च तपाइक्‍ना पाइक्‍न बाक्‍माक्‍त। 22 मिनु येसुमी यूहन्‍ना आ शेंसीब आस कली “मार मार तसी, मार मार नेंसी, मेको नेल्‍ल यूहन्‍ना कली मतीसे। मिक्‍च मताइब मिक्‍च ताइबाक्‍तेक्‍म। खोइल मदुक्‍ब गाक्‍बाक्‍तेक्‍म। कोव़र पाइब साबाक्‍तेक्‍म। नोफा मनेंबम नेंबाक्‍तेक्‍म। बेक्‍शो मुर बेक्‍शो रे सेंसीशा ब्रोंइबाक्‍तेक्‍म। मिनु महिक्‍सीशो मुरपुकी ग्‍येरपाइक्‍ब लोव़ नेंपांइ‍सीबाक्‍तेक्‍म। 23 सु सुमी आं कली तशा, आन थुं मखाइक्‍पाइक्‍नीमी, दल्‍गीर मपाइनीमी, मेको ग्‍येरसमल, दे मतीसे” दे सोइक्‍तीम्‍सी बाक्‍त।

24 मिनु यूहन्‍नामी सोइश्‍शो मुर गाक्‍सा नोले, येसुमी मुर आन कली यूहन्‍ना आ पर्बम “साइ गोरशो रागीमी मार कोव़थ लनी? फशेम हिम्‍शो किन्‍दा कोव़थ लनी? 25 दारशो वा फेक्‍शो मुर तांइसीबा कों, दे कोव़थ लनी? दारदारशो वा फेक्‍शो नु शोंप पाइश्‍शो मुर पिप आन बाक्‍तीकेमी बाक्‍नीम। 26 मार कोव़थ लनी, मिनु? परमप्रभु यावे आ लोव़ पाइब तांइसीबा कों, दे कोव़थ लनी? गे परमप्रभु यावे आ लोव़ पाइब नेल्‍ल आन क्‍येङा ठेयब मुर ताइतीनी। लूका १:७६ 27 परमप्रभु यावेमी ब्रेक्‍पाइश्‍शो लोव़मी मेको आ पर्बम ‘गो आं लोव़ कुरब इ ङोंइङोंइती सोइक्‍नुङ। मेकोमी इ लां ठीक सेल्‍ब’ दे ब्रेक्‍शो बाक्‍ब। मलाकी ३:१ 28 रागी नेल्‍लेम यूहन्‍ना खोदेंशो ठेयब सुइ मबाक्‍ब। परमप्रभु यावे आ राज्‍यमी नेल्‍ल क्‍येङा आइक्‍च चहिं यूहन्‍ना क्‍येङा ठेयब बाक्‍ब” दे शेंदीमी बाक्‍त। लूका १:१५ 29 आ लोव़ नेंबपुकी नु तिरो पोक्‍ब का निक्‍शीमी ङोंइती यूहन्‍ना आ लोव़ नेंशा “परमप्रभु यावे आ देंशो ठीक बाक्‍माक्‍त” दे मिम्‍तमे बाक्‍त। मारदे हना मेको ब्‍वाक्‍कुम ख्रुम्‍शा ग्रुंइपांइसीशो बाक्‍मा बाक्‍त। लूका ३:७,१२; मत्ती २१:३२ 30 फरिसी नु सास्‍त्रीपुकीमी चहिं यूहन्‍ना आ लोव़ नेंशा “ब्‍वाक्‍कुम मख्रुम्‍पांइसीनीकी” दे परमप्रभु यावे कली थमा मसुइक्‍थु बाक्‍मा बाक्‍त। मेकोपुकीमी परमप्रभु आ पावो, दे देंशो लोव़ मपामे बाक्‍त। प्रेरित १३:४६ 31 मेको आन कली येसुमी “एको पाला ङा मुर दोदेंशो नु सु खोदेंशो नमी? 32 मेकोपुकी बजारम बाक्‍ब आलपुकी खोदेंशो बाक्‍नीमी। हुल कामी अर्को हुल कली ‘गो बासुरी ताप्‍कानु, गे सिल मपनी। गो हिशेक पा ङाक्‍कानु, गे मङाक्‍नी’ दे ब्रेम्‍मुइनीम। 33 यूहन्‍नामी माइजा बाक्‍शा, शांबु राकसी मतूङानु ‘वोलम सुम्‍शो बाक्‍माक्‍त’ दे मरिम्‍शो सुइक्‍तीनी। मत्ती ३:४ 34 रागीम जरमेशोमी चहिं जचा तूचा थोव़की नेल्‍ल जाइब तूब। मेको कली तशा ‘धोक्रे, शांबु राकसीमी दुक्‍ब, क्‍येट पोक्‍ब नु पापी आन वारच बाक्‍माक्‍त’ देंशा, मरिम्‍शो सुइक्‍तीनी। लूका १५:२ 35 परमप्रभु यावे आ तुइक्‍तीके आ नोले खोइक्‍बम ला तुइक्‍ने चाप्‍नीम” दे माइक्‍मी बाक्‍त। १कोरिन्‍थी १:२४-३०

36 काबु फरिसी कामी येसु कली खमे जथ ब्रेत्‍ता बाक्‍त। मिनु येसु मेको आ खिंम लशा, खमे जचा कली निस्‍से बाक्‍त। लूका ११:३ 37 मिनु सहर ङा मीश मुर का यो बाक्‍माक्‍त। मेको तेल्‍लेम बाक्‍माक्‍त। मेकोमी येसु मेको फरिसी आ खिंमी जाक्‍शो बाक्‍ब, दे नेंशा, ब्रोव़शो रिना पाइश्‍शो तेल कुरशा, जाक्‍माक्‍त। मर्कूस १४:३ 38 मेको येसु आ खोइलीम बाक्‍शा ङाक्‍माक्‍त। मिनु आ प्रेक्‍कुम येसु आ खोइल जिप्‍‍पाइश्‍शा, आ चांमी फिक्‍गा बाक्‍त। मिनु आ खोइल पुक्‍पु पा मेको तेल ख्रेक्‍ता बाक्‍त। 39 मिनु फरिसीमी मो पशो तशा “येसु परमप्रभु यावे आ लोव़ पाइब बाक्‍त हना, आ कली थीब मीश मुर दोदेंशो बाक्‍म, दे तुइक्‍त वा। मारदे हना पापी बाक्‍ब” दे मिम्‍ता बाक्‍त। 40 मिनु येसुमी फरिसी कली “ए सिमोन, गो इ कली लोव़ का पाइनुङ” देंमाक्‍त। मिनु मेकोमी “शेंब, मार देंनीनी?” देंमेनु 41 येसुमी “साइ होव़प का के जेर लाइक्‍ब मुर निक्‍शी बाक्‍सा बाक्‍त। कामी ५ सहे देनार जेर थुइश्‍शो बाक्‍माक्‍त। कामी ५० देनार जेर थुइश्‍शो बाक्‍माक्‍त। इस्राएल ङा क्‍येट देनार का नाक्‍त का ङा गाल्‍च बाक्‍त। 42 मिनु निम्‍फामी थाप्‍‍ने मचाप्‍सेनु, होव़पमी निम्‍फा आस कली प्रोंइदीम्‍सी बाक्‍त। मुल तेकोमी होव़प कली शुश दाक्‍बा?” दे हिल्‍लो पवा बाक्‍त। 43 मिनु सिमोनमी “शुश जेर थुइश्‍शोमी शुश दाक्‍ब, दे मिम्‍ताक्‍ङ” देंमाक्‍त। मिनु येसुमी “ठीक देंते” देंशा, 44 मीश मुर कली कोव़शा, सिमोन कली “एको मीश मुर कली तवी? गो इ खिंमी जाक्‍ङानु, आं खोइल चिक्‍चा कली ब्‍वाक्‍कु मगेयी। एकोमी दा आं खोइल आ प्रेक्‍कुम जिप्‍‍पाइश्‍शा, आ चांमी फिक्‍तु। उत्‍पत्ती १८:४ 45 गो जाक्‍ङानु, आं कली मुप्‍शा पुक्‍पु मपाइय्‍यी। एकोमी दा इ खिंम बाक्‍ङा रे आं खोइल पुक्‍पु पना पन बाक्‍ब। रोमी १६:१६ 46 गेमी आं पियाम तेल मख्रेक्‍ती। एकोमी दा आं खोइलीम तेल ख्रेक्‍ताक्‍यी। 47 मोपतीके एको के शुश पाप नेल्‍ल क्‍याम्‍साक्‍व। मारदे हना एकोमी शुश आ दाक्‍तीके कोंइताक्‍व। सु के पाप इच्‍का ला क्‍याम्‍से, मेकोमी इच्‍का ला दाक्‍ब” दे मदा बाक्‍त। 48 मिनु मीश मुर कली “इ पाप क्‍याम्‍साक्‍व” दे मदा बाक्‍त। 49 मिनु येसु नु काथा जाइबपुकीमी “पाप क्‍याम्‍ने चाप्‍ब, एको सु बाक्‍म माइ?” देंमुमा बाक्‍त। लूका ५:२१ 50 मिनु येसुमी मीश मुर कली “इ थमा सुइश्‍शोमी पाप रे ब्रोंइते। इ थुं नाइश्‍शा ग्‍येरशा बाक्‍को” देंशा सोइक्‍ता बाक्‍त। लूका ८:४८; लूका १७:१९; लूका १८:४२