1 मिनु नाक्‍त का निक्‍शी नोले येसु सहर सहर, गाउं गाउं हिरशा, परमप्रभु यावे आ राज्‍य ङा ग्‍येरपाइक्‍ब लोव़ शेंना शेंन गाक्‍माक्‍त। मेको नु आ १२ जना शेंसीब यो बाक्‍मा बाक्‍त। 2 मेको नु मीश मुर का निक्‍शी यो बाक्‍मा बाक्‍त। मेको वोल ग्रुंइशो नु रोइ रे साशो बाक्‍मा बाक्‍त। मेको आन दातेमी माग्‍दाला ङा मरीयम बाक्‍माक्‍त। येसुमी मेको रे पा ७ ओटा वोल ग्रुंइशो बाक्‍माक्‍त। यूहन्‍ना २०:१,११-१८ 3 का हेरोद आ गेय पाइब कूजा आ मीश योअन्‍ना बाक्‍माक्‍त। का सुसन्‍ना बाक्‍माक्‍त। मिनु अरु मीश मुरपुकी यो बाक्‍मा बाक्‍त। मेको मीश मुरपुकीमी आन बाक्‍शो थोव़क रे येसु नु आ शेंसीब आन कली मार मार माल्‍‍मा, मेको गेशा, वारच पाइक्‍बाक्‍मा बाक्‍त। मर्कूस १५:४०-४१

4 मिनु सहर सहर, गाउं गाउं रे शुश मुर जाक्‍शा, येसु आ बाक्‍तीकेम देल्‍मानु, मेकोमी कथा सेल्‍शा शेंदीमी बाक्‍त 5 “मुर का वांचेर शोक्‍थ लमाक्‍त। मिनु ब्‍वारानु, गेडा का निक्‍शी लांमी जुक्‍तमे बाक्‍त। मिनु मुर गाक्‍मानु, दिम्‍दमे बाक्‍त। मिनु चिक्‍बीम गुप्‍शा जामे बाक्‍त। 6 का निक्‍शी ग्‍याङग्रो खपम जुक्‍तमे बाक्‍त। मिनु वामा चोटी सिक्‍शो नु खप मतथु सोव़शा बेक्‍मा बाक्‍त। 7 का निक्‍शी चू घारीम जुक्‍तमे बाक्‍त। मिनु चूम सुम्‍शा, कोल्‍चा मगेवा बाक्‍त। 8 मिनु का निक्‍शी रिम्‍शो खपीम जुक्‍शा वामा बाक्‍त। मिनु शुश ग्रेल्‍शा, गेडा का के सहे का गेडा सिम्‍मा बाक्‍त” दे शेंशा ठेयब सेंदा पा “सु के नोफा बाक्‍मे, मेकोमी नेनल” देंमाक्‍त।

9 मिनु नोले आ शेंसीबपुकीमी “एको कथा आ अर्थ मार बाक्‍बा?” दे हिल्‍लो पामेनु, 10 येसुमी “इन कली परमप्रभु यावे आ राज्‍य आ पर्बम ख्रुइश्‍शो लोव़ रुप्‍तीक थुं गेशो बाक्‍ब। अरु आन कली चहिं कथा सेल्‍शा शेंनुङमी। मिनु कोव़शा यो मतामेक्‍ल, नेंशा यो मरुप्‍मेक्‍ल। यसैया ६:९-१०

11 आं देंशो कथा आ अर्थ मार बाक्‍ब देंशा हना, मेको वांचेर परमप्रभु यावे आ लोव़ बाक्‍ब। 12 लांमी जुक्‍शो गेडा देंशो मुरपुकीमी परमप्रभु यावे आ लोव़ नेंनीम। तन्‍न सैतानमी मेको लोव़ प्रेंपाइक्‍ब। मोपा थमा मसुइक्‍नीम। मिनु पाप रे ब्रोंइचा मताइनीम। 13 ग्‍याङग्रो खपीम जुक्‍शो देंशो मुरपुकीमी परमप्रभु यावे आ लोव़ नेंशा, बिश्‍शा ग्‍येरसीनीम। तन्‍न शाक्‍श थोक्‍चा मतथु शुश मलीथु, थुं थाम्‍चा पुंइस‍मानु, थमा सुइक्‍चा प्रोंइनीम। 14 चू घारीम जुक्‍शो देंशो मुरपुकीमी परमप्रभु यावे आ लोव़ नेंशा, थुंम वोइक्‍नीम। तन्‍न नोले ‘मार जचा, मार फेक्‍चा, दोपा शोंप पाइश्‍शो दुम्‍चा? दोपा गेय मपथु ग्‍येरशा बाक्‍चा तचा’ दे मिम्‍शा, परमप्रभु यावे आ लोव़ कली सित्‍चा मगेनीम। 15 रिम्‍शो खपीम जुक्‍शो देंशो मुरपुकीमी परमप्रभु यावे आ लोव़ नेंशा, आन रिम्‍शो थुंमी वोइश्‍शा, मिम्‍शा बाक्‍मानु, मेको लोव़ आन थुंमी सिप्‍ब। प्रेरित १६:१४

16 सुइमी बत्ती दाशा सुम्‍शा मवोइक्‍नीम। खाट आगाम यो मख्रुइक्‍नीम। खिं ओव़ब आन कली हाम्‍सो दुम्‍ल, दे नेल्‍लेम ततीकेम वोइक्‍नीम। मत्ती ५:१५ 17 मुल ख्रुइश्‍शो मारेइ मारेइ नेल्‍ल नोले तांइसीब। ख्रुइश्‍शो लोव़ बाक्‍त हना यो, नोले नेल्‍लेम तुइक्‍नीम। मत्ती १०:२६; १कोरिन्‍थी ४:५ 18 होस पा, रिम्‍शो पा नेनीन। मारदे हना रुप्‍बमी तेम्‍शा रुप्‍पाइक्‍चा पुंइसीब, मरुप्‍बम चहिं इच्‍का खोइ रुप्‍शो यो, रोइश्‍शा लाइक्‍चा पुंइसीब” दे शेंदीमी बाक्‍त। मत्ती २५:२९

19 काबु येसु आ ममा नु आ लोक्‍ब जाक्‍मा बाक्‍त। तन्‍न शुश मुर देल्‍तीके येसु कली ग्रुम्‍चा मतामे बाक्‍त। 20 मिनु मुर कामी “इन ममा नु इन लोक्‍ब इन कली ग्रुम्‍थ जाक्‍शा, लाङगाम रिम्‍शा बाक्‍नीम” देंमाक्‍‍त। 21 मिनु येसुमी “परमप्रभु यावे आ लोव़ नेंशा, टीबपुकी कका थमा ङा आं ममा नु लोक्‍ब नम” दे माइक्‍मी बाक्‍त।

22 काबु येसु नु आ शेंसीबपुकी डोंगाम ङोइश्‍शा “समुन्‍द्र शोक्‍शा, आइक्‍ची हांबु ल‍य” दे लचा गोव़मे बाक्‍त। 23 मिनु मोपा लमानु, येसु निन्‍द्रा पवा बाक्‍त। मिनु फश गिवार पचा गोवा बाक्‍त। मिनु डोंगामी ब्‍वाक्‍कु ओव़शा, डोंगा ग्रुम्‍चवा बाक्‍त। 24 मोपतीके शेंसीबपुकीम येसु कली पोक्‍शा “शेंब, शेंब! मुल बेक्‍चांइतय, है” दे हिंशा ख्रिंख्रि पा देंमा बाक्‍त। मिनु येसु बोक्‍शा, फश गिवार नु छाल कली हुइक्‍ता बाक्‍त। मिनु फश गिवार नाइश्‍शा ब्‍वाक्‍कु यो ख्रा दिक्‍माक्‍त। मिनु सिक्‍सी दुम्‍माक्‍त। 25 मिनु शेंसीब आन कली “इन थमा सुइक्‍तीक ते लम?” देंमाक्‍त। मेकोपुकी चहिं हिंशा, छक लाक्‍शा “फश गिवार नु ब्‍वाक्‍कुमी यो आ लोव़ टीबाक्‍तेक्‍म, एको सु बाक्‍म माइ?” दे लोव़ पमुमा बाक्‍त।

26 मिनु समुन्‍द्र शोक्‍शा, गेरासीनी आन रागी जाक्‍दीम्‍मा बाक्‍त। गेरासीनी आन रागी चहिं गालील रागी क्‍येङा आइक्‍ची हांबुम बाक्‍माक्‍त। 27 मिनु जाक्‍दीश्‍शा, डोंगा रे तोंइसामानु, वोलम सुम्‍‍शो मुर का सहर रे पिशा, येसु आ ङोंइती जाक्‍माक्‍त। मेको मुर वोलम सुमा रे शिश्रा गाक्‍शा, खिंमी मबाक्‍थु, बेक्‍शो मुर वोइक्‍तीकेमी बाक्‍शो बाक्‍माक्‍त। मोपा बाक्‍शो शुश बर्स दुम्‍शो बाक्‍माक्‍त। 28 मेकोमी येसु कली तशा, वाइ ब्रेश्‍शा, आ ङोंइती बाप्‍शा, ठेयब सेंदा पा “येसु, नेल्‍ल क्‍येङा ठेयब, आ तौ, गो मार पमुया ङा? श्‍येत मगेयीनी, दे सेउ पाइनन्‍नी” देंमाक्‍त। 29 मारदे हना येसुमी ग्रांग्रा दिचा ङा वोल कली “ग्रूङो” दे माइश्‍शो बाक्‍माक्‍त। ङोंइती शुश खेयप वोलम मेको मुर कली सुमानु, मुरपुकीमी साङलोम पाइश्‍शा चोक्‍शा वोइश्‍शो बाक्‍मा बाक्‍त। तन्‍न वोलम साङलो प्रुइक्‍पाइश्‍शा, गोरशो रागीम चाक्‍दीश्‍शो बाक्‍माक्‍त। 30 मिनु मेको येसु आ ङोंइती बाप्‍शा बाक्‍मेनु, येसुमी वोल कली “इ नें मारम?” दे हिल्‍लो पवानु, मेकोमी “फौज” देंमाक्‍त। मारदे हना मेको मुर आ रांमी शुश वोल ओव़शो बाक्‍मा बाक्‍त। 31 मिनु वोलपुकीम “आंइ कली नरकम मसोइक्‍तीकी” दे पुन्‍मे बाक्‍त।

32 मेको डांडामी शुश पोव़ जोना जोन बाक्‍शो बाक्‍मा बाक्‍त। मिनु वोलपुकीमी “मेको पोव़ आन रांम ओव़चा गेकी” दे पुन्‍मे बाक्‍त। मिनु येसुमी ओव़चा गेमी बाक्‍त। 33 मिनु वोलपुकी मुर रे ग्रूशा, पोव़मी ओव़मानु, पोव़ नेल्‍ल गशा रोंगु रे दोरशा थिश्‍शा समुन्‍द्रम प्रेक्‍ना प्रेक्‍न बेक्‍मा बाक्‍त।

34 मिनु पोव़ योव़बपुकीमी मो दुम्‍शो तशा प्रोक्‍शा, सहर नु सहर आ एर ओंथ नेल्‍ल मेको लोव़ शोव़ङमे बाक्‍त। 35 मिनु मुरपुकी मार दुम्‍मे, दे कोव़थ जाक्‍मा बाक्‍त। मिनु येसु आ नेक्‍था वोल ग्रूशो मुर वा फेक्‍शा, आ गशो थुं साशा, येसु नु निश्‍शो तशा, हिंमा बाक्‍त। 36 वोलम सुम्‍शो मुर दोपा सामे, मेको ताइबपुकीमी जाक्‍ब आन कली मार मार दुम्‍मे, मेको नेल्‍ल शेंदमे बाक्‍त। 37 मिनु गेरासीन रागीम बाक्‍बपुकीमी येसु कली “आंइ रागीम मबाक्‍कीन, लने” दे पुन्‍मे बाक्‍त। मारदे हना थाम्‍पा हिंमा बाक्‍त। मिनु येसु डोंगा ङोइश्‍शा लेम्‍माक्‍त। 38 मिनु डोंगा ङोइश्‍शा लचावानु, वोल ग्रुंइचा पुंइसीशो मुरुमी “गे नु ल‍चा गेयीनी” दे पुना बाक्‍त। 39 तन्‍न येसुमी “इ खिंम लशा, इ मुर आन कली परमप्रभु यावेमी इ कली दोदेंशो रिम्‍शो पवा, मेको तुइक्‍पतो” दे सोइक्‍ता बाक्‍त। मिनु मेको लशा, आ खिंमी ला ममाइ, सहर ङा मुर नेल्‍ल आन कली येसुमी दोदेंशो रिम्‍शो पवा, मेको तुइक्‍पदा बाक्‍त।

40 मिनु येसु लेश्‍‍शा जाक्‍मेनु, शुश मुरुमी येसु कली रिम्‍शा बाक्‍शो बाक्‍मा बाक्‍त। 41 मिनु मेकेर याइरस माइश्‍शो ग्रुम्‍तीक खिं ङा ठेयब मुर का येसु आ ङोंइती पोक्‍च थेक्‍शा बाप्‍शा “आं तमी बेक्‍चा चिक्‍ताक्‍व। आं खिं लय” दे सेउ पा पुना बाक्‍त। 42 मेको के १२ बर्स जाक्‍दीश्‍शो तमी का ला बाक्‍माक्‍त। मिनु मेको रोइ पा बेक्‍चशो बाक्‍माक्‍त। मिनु येसु लमेनु, हुल ङा मुरपुकीमी येसु कली डी डा चूमे बाक्‍त।

43 मेको हुलमी १२ बर्स रे हुश याप्‍शा रोइ पशो मीश मुर का बाक्‍माक्‍त। मेकोमी ओख्‍ती पा आ बाक्‍शो नेल्‍ल थुम्‍शो बाक्‍माक्‍त। तन्‍न सुइमी मेको कली आ रोइ सापाइक्‍ने मचाप्‍शो बाक्‍मा बाक्‍त। 44 मिनु मेकोमी येसु आ नोले जाक्‍शा, येसु आ फेक्‍शो वा थिवा बाक्‍त। मिनु आ हुश याप्‍चा दिक्‍माक्‍त। 45 मिनु येसुमी “सुमी थियी?” दे हिल्‍लो पवानु, नेल्‍लेमी “गो मथिङ, गो मथिङ” देंमा बाक्‍त। मिनु पत्रुसमी “शेंब, मुरपुकीमी हुल पा नेम्‍मुइनीम, चुमुइनीम। मिनु मार पचा?” देंमाक्‍त। 46 येसुमी चहिं “मुर कामी आं कली थिती। मारदे हना आं सक्ति लशो तुइक्‍ताक्‍ङ” देंमाक्‍त। 47 मिनु मेको मीश मुरुमी ख्रुइक्‍ने मचाप्‍नुङ, दे मिम्‍शा हिंशा ख्रिंख्रि पना पन येसु आ ङोंइती बाम्‍माक्‍त। मिनु मेकोमी येसु कली मारदे थिवा चोटीन दोपा सामे, मेको लोव़ नेल्‍ल मुर आन ङोंइती शोव़ङा बाक्‍त। 48 मिनु येसुमी “आं तमी, इ थमा सुइश्‍शोमी साते। इ थुं नाइश्‍शा लावो” दे सोइक्‍ता बाक्‍त। लूका ७:५०

49 येसुमी मेको मीश मुर नु लोव़ पवानु, याइरस आ खिं ङा मुर का जाक्‍शा, याइरस कली “शेंब कली श्‍येत मगेने। इन तमी बेक्‍त” देंमाक्‍त। 50 येसुमी मेको मुर आ लोव़ नेंशा, याइरस कली “महिनो। थमा सुइक्‍ना सुइक्‍न बाक्‍को। इ तमी साब” देंमाक्‍त। 51 मिनु खिंमी जाक्‍दीश्‍शा, येसुमी पत्रुस, याकूब, यूहन्‍ना नु आल आ आम आफ आन कली ला लाइश्‍शा आगा ओव़मा बाक्‍त। मत्ती १७:१ 52 मेकेर बाक्‍ब नेल्‍ल हिशेक पा ङाक्‍शो बाक्‍मा बाक्‍त। मिनु येसुमी मेको आन कली “मङाक्‍कीन, आल मबेक्‍शो बाक्‍ब। मेको इप्‍शो बाक्‍ब” देंमाक्‍त। लूका ७:१३ 53 मेकेर बाक्‍बपुकीमी आल बेक्‍ने थुम्‍शो बाक्‍ब, दे तुइश्‍शा “एको मार लोव़ पवा?” दे शुक्‍शी पामे बाक्‍त। 54 मिनु येसुमी आल कली गुइम ग्‍याइश्‍शा “ए आल, सेंसो” देंमाक्‍त। 55 मो मदानु आ सोक्‍त लेश्‍शा छुल बोक्‍माक्‍त। मिनु येसुमी “मेको आल कली इच्‍का जचा गेने” दे माइक्‍मी बाक्‍त। 56 मेको तशा, आल आ आम आफ छक लाक्‍सा बाक्‍त। मिनु येसुमी “एको लोव़ सुइ आन कली मशेंदीसे” दे माइक्‍सी बाक्‍त। लूका ५:१४; मर्कूस ७:३६