1 دَرِ سَلَمُكَيٍ نَشَ يٌرَ مِ شَ دِ لَنمَ عَشَسِيَ تِ يٍهٌرَ مِ حْشْي رَ. عَرَبُيٍ نُ بَرَ عَ شَ دِ بٌورٍيٍ قَشَ. يٌرَ مِ شَ دِ عَشَسِيَ قِندِ يُدَيَ مَنفّ رَ نَ كِ نّ. 2 عَشَسِيَ مَنفّيَ سْتْ عَ حّ تٌنفٌ نَانِ نُن قِرِن نَن مَ. عَ مَنفّيَ رَبَ دَرِ سَلَمُ حّ كٍرٍن. عَ نفَ نُ شِلِ نّ عَتَلَيَ، عٌمِرِ شَ دِ فِنّ نَن نُ عَ رَ. 3 عَشَسِيَ قَن نَشَ عَ حّرّ عَشَبِ بْنسْي شَ مِسَالِ مَ، بَرِ مَ عَ نفَ نُ مَرَ سِ حَاشِ نَن قِمَ عَ مَ. 4 عَ نَشَ قٍيٍ رَبَ نَشٍيٍ مُ رَقَن عَلَتَلَ مَ، عَلْ عَشَبِ بْنسْي عَ رَبَ كِ نَشّ. عَ بَبَ قَشَ شَنبِ، عَشَبِ رَ سِمَيٍ نُ لُمَ عَ رَتَنتَن نَ.

5 نَ بَرَ عَ نِيَ عَشَسِيَ شَ بِرَ عِسِرَيِلَ مَنفّ عَشَبِ شَ دِ يٍهٌرَ مِ قْشْ رَ، عٍ شَ سِفَ سِرِيَ مَنفّ شَسَيٍلِ فٍرٍدٍ رَ مٌتِ فَلَدِ بْشِ مَ. سِرِيَكَيٍ نَشَ يٌرَ مِ مَشْنْ نَ فٍرٍ كُي. 6 سِرِيَكَيٍ تٌ عَ مَشْنْ رَ مَ، يٌرَ مِ نَشَ فبِلٍن يِسِرٍيلِ عَ دَندَندٍ. فٍرٍ تٌ حْن عِسِرَيِلَ نُن سِرِيَ مَنفّ شَسَيٍلِ تَفِ، يُدَيَ مَنفّ يٌرَ مِ شَ دِ عَسَرَيَ نَشَ فٌرٌ يِسِرٍيلِ عَشَبِ شَ دِ يٌرَ مِ شّيبُدٍ، بَرِ مَ عَ نُ مَشْنْشِ عَ حَاشِ رَ.

7 عَلَ شَ مَرَفِرِ كُي، عَشَسِيَ تٌ قَ يٌرَ مِ يِرٍ، نَ نَن قِندِ عَشَسِيَ بّ بْنْي رَ. عَ تٌ سٌ نَ، عَ تَن نُن يٍهٌرَ مِ نَشَ مِنِ سِفَقٍ رَ نِمِسِ شَ دِ يٍهُ يِرٍ. عَلَتَلَ نُ بَرَ يٍهُ سُفَندِ عَ شَ عَشَبِ بْنسْي سْنتْ. 8 يٍهُ نُن عَشَبِ بْنسْي شَ فٍرٍ كُي، يٍهُ نَشَ يُدَيَ كُنتِفِيٍ نُن عَشَسِيَ شَ مَمَدِيٍ لِ نَا، عَ نَشَ عٍ قَشَ. عَشَسِيَ شَ مَمَدِيٍ نُ نَ عَشَسِيَ شَ يَامَرِ نَن بُن مَ. 9 عٍ نَشَ عَشَسِيَ قٍن، عٍ نَشَ عَ سُشُ سَمَرِ عَ نُ نْشُنشِ دّننَشّ. عٍ نَشَ قَ عَ رَ يٍهُ يِرٍ، عٍ قَ عَ قَشَ. نَ شَنبِ، عٍ نَشَ عَ رَفَتَ، بَرِ مَ عٍ نُ عَ قَلَمَ نّ، «يٍهٌسَقَتِ شَ دِ نَ عَ رَ، نَشَن نُ عَلَتَلَ قٍنمَ عَ بْحّ بِرِن نَ.» عَشَسِيَ شَ مِشِ يٌ مُ نُ نَ نَشَن نْمَ قِندِدٍ مَنفّ رَ.

10 عَشَسِيَ نفَ عَتَلَيَ تٌ عَ تٌ عَ شَ دِ بَرَ قَشَ، عَ نَشَ كٍلِ، عَ مَنفّ شَ دِيٍ بِرِن قَشَ يُدَيَ. 11 كْنْ مَنفّ شَ دِ فِنّ يٍهٌسٍيبَ، نَشَ عَشَسِيَ شَ دِ يٌوَ سِ تٌنفٌ فُندٌ رَ مَنفّ شَ دِيٍ يَ مَ عَتَلَيَ نُ وَ مَ نَشٍيٍ قَشَقٍ، عَ قَ عَ شَنِن فِنّ دِ مَشُرُي ندٍ شْن، عَ دِيْرّ نُن نَ دِ مَشُرُي نْشُن هْرْ مْبَنشِ كٌنكٌي ندٍ كُي. مَنفّ يٍهٌرَ مِ شَ دِ فِنّ يٍهٌسٍيبَ، سّرّشّدُبّ يٍهٌيَدَ شَ فِنّ، عَشَسِيَ شُنيَ فِنّمَ، يٌوَ سِ نْشُن نَ كِ نّ عَتَلَيَ مَ، عَ مُ نْ عَ قَشَدٍ. 12 عٍ يٌوَ سِ نُن عَ شُرُ مِشِيٍ نْشُن نّ، عَلَتَلَ شَ هْرْ مْبَنشِ كُي حّ سٍننِ بُن مَ. نَ وَشَتِ، عَتَلَيَ نَن نُ بْشِ يَمَرِ مَ.