1 نَ كْي رَ مَنفّ مُ نْ شِدٍ. عَ نَشَ شّيرَ رَ سِفَ بُكِيٍ تٌنفٌدٍ نَشٍيٍ نُ قِندِشِ مَنفّيَ شَ تَرُشُي رَ. نَ نَشَ شَرَن مَنفّ بّ. 2 عٍ نَشَ قٍ ندٍ شَرَن مٌرٌدٍكَيِ شَ قٍ رَ. عَ نُ بَرَ عَ كٌلٌن مَنفّ بَنشِ كَنتَمَيٍ بِفِتَنَ نُن تّرّ سِ نُ وَ مَ مَنفّ عَسُيٍرُ سُ قَشَقٍ نّ. 3 نَ كُي مَنفّ نَشَ عَ شَ بَتُلَيٍ مَشْرِن، «وٌن مٌرٌدٍكَيِ بِنيَ دِ نَ قٍ مَ؟» مَنفّ شَ بَتُلَيٍ نَشَ عَ يَابِ، «قٍقٍ مُ نُ رَبَ عَ بّ سِندٍن.»

4 مَنفّ مَن نَشَ عٍ مَشْرِن، «ندٍ بَشِ سٌدٍ ﭑ مَ بَنشِ كُي يَكْسِ؟» هَمَن نُ بَرَ سٌ مَنفّ شْنيِ، عَلَكٌ عَ شَ عَ مَيَندِ مٌرٌدٍكَيِ شَ فبَكُ وُرِ مَ، نَشَن نُ بَرَ فّ تِدٍ نَا. 5 نَ نَ عَ رَ مَنفّ شَ بَتُلَيٍ نَشَ مَنفّ يَابِ، «هَمَن نَن بٍ.» مَنفّ نَشَ عَ قَلَ عٍ بّ، «عَ شَ قَ ﭑ يِرٍ.» 6 هَمَن تٌ سٌ، مَنفّ نَشَ عَ مَشْرِن، «مِشِ ندٍ نَ ﭑ وَ مَ نَشَن بِنيَقٍ كِ قَنيِ. ﭑ لَن ﭑ شَ مُنسٍ رَبَ نَ كَنيِ بّ؟» هَمَن نَشَ عَ مَحْشُن عَ بْحّ مَ، «مِشِ فبّتّ مُ نَ مَنفّ وَ مَ نَشَن بِنيَقٍ بَقٍ ﭑ تَن نَ.» 7 نَ كُي هَمَن نَشَ مَنفّ يَابِ، «مَنفّ، عِ وَ مَ مِشِ نَشَن بِنيَقٍ، 8 عَ لَنمَ مَنفّ دُفِ، مَنفّ بَرَ نَشَن نَفٌرٌ عَ مَ، عَ شَ نَ رَفٌرٌ نَ مِشِ مَ. عٍ مَن شَ قَ سٌي ندٍ رَ عِ بَرَ دْشْ نَشَن قَرِ، مَنفّ تْنشُمَ سَشِ نَشَن مَ. 9 عِ شَ مِشِ شُنفبٍ ندٍ شَ نَ دُفِ رَفٌرٌ نَ مِشِ مَ، عِ وَ مَ نَشَن بِنيَقٍ. عَ نَ تٍ سٌي قَرِ، بٌورٍ شَ عَ رَحّرّ تَا كُي، عَ شَ سِفَ مَسٍنيِ تِ رَ، ‹وٌ عَ مَتٌ مَنفّ نَشَن نَبَمَ مِشِ بّ، عَ وَ مَ نَشَن بِنيَقٍ.›»

10 عَوَ، مَنفّ نَشَ عَ قَلَ هَمَن بّ، «عِ شُلُن، عِ سَ دُفِ نُن سٌي تٌنفٌ، عِ قَ عِ شَ وْيّنيِ بِرِن نَكَمَلِ مٌرٌدٍكَيِ بّ، نَ يُوِقِ نَشَن دْشْمَ مَنفّ شَ بَنشِ سٌدٍ دّ رَ. عِ نَشَ نّيمُ عِ قَلَ شُي سٍسٍ مَ.» 11 نَ تّمُي هَمَن نَشَ سَ دُفِ نُن سٌي تٌنفٌ. عَ نَشَ مَنفّ دُفِ رَفٌرٌ مٌرٌدٍكَيِ مَ. مٌرٌدٍكَيِ تٌ تٍ سٌي قَرِ، هَمَن نَشَ سٌي رَحّرّ تَا كُي عَ مَسٍنقٍ رَ حَمَ بّ، «‹وٌ عَ مَتٌ مَنفّ نَشَن نَبَمَ مِشِ بّ، عَ وَ مَ نَشَن بِنيَقٍ.›»

12 عٍ تٌ فّ نَ رَبَدٍ، مٌرٌدٍكَيِ نَشَ فبِلٍن مَنفّ شَ بَنشِ سٌدٍ دّ رَ، هَمَن تَن نَشَ عَ شُلُن سِفَقٍ رَ عَ شْنيِ، عَ يَتَفِ عِشْنْشِ. 13 هَمَن تٌ نَ بِرِن قَلَ عَ شَ فِنّ سّرّ سِ نُن عَ دّقَنبٌورٍيٍ بّ، عٍ نَشَ عَ يَابِ، «شَ يِ مٌرٌدٍكَيِ، يُوِقِ بْنسْي نَ عَ رَ، عِ مُ نْمَ تِدٍ عَ كَنكٍ. عِ قَمَ نّ عِ يّتّ شُن نَكَنَدٍ تُن!»

14 نَ تّمُي يَتِ مَنفّ شَ مِشِ ندٍيٍ نَشَ قَ عَ شِلِدٍ، عَ شَ سِفَ مَنفّ فِنّ عٍسِتَ شْنيِ عَ دّفٍدٍ.