1 Man Paul, on ka Winaꞌam gaŋ m ne o boodim ye m a Yesu Kiristo Tumtum la, ne ti baꞌabiig Timoti, sobid gbauŋ kaŋa n tisid Winaꞌam nidib bane wusa be Korint ne Akaia teensin wusa la.

2 Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim.

3 Keli ka ti puꞌus Winaꞌam one aa ti Zugsob Yesu Kiristo Baꞌ la bareka, on one aa ti Baꞌ ka zoti ti nimbaanlig, ka a Winaꞌam ka suŋir wusa yit o saꞌan na la. 4 O suŋidi ti ti yeltood wusa poogin, ye ti nyaŋedi nokid suŋir kane ka ti diꞌed Winaꞌam saꞌan la n suŋid bane mor yeltood sieba wusa la. 5 Ti sadigim nyet namisug bedego Kiristo zug, ala men ti na diꞌe suŋir bedego ka li yine Kiristo saꞌan na. 6 Ti yaꞌa nye yeltoog, li ane ye yanam me yaꞌa ti nye yeltoog, ya na nye suŋir ne faangir, ka li yine tinam saꞌan na. Ka tinam yaꞌa nye suŋir Winaꞌam saꞌan, yanam me na nye suŋir, ka li yine ti saꞌan na, ka na diꞌe paŋ ye ya modig ya namisug poogin line wenne namisug kane ka tinam nye la. 7 Ti tiꞌir ya yela kaꞌa biꞌesugo. Ti miꞌ ye yaname sadigim namisid wuu tiname namisid siꞌem la, ya na diꞌe suŋir wuu tiname diꞌed siꞌem la.

8 M baꞌabiise, ti bood ye ya baŋ yeltoog kan ka ti daa nye Asia teŋin la yela. Yeltoog la daa daami ti bedego ka gaadi ti paŋ ben, ka ti daa pu len tenꞌesid vum yelaa, 9 ka tenꞌes ye li ane wuu koto ni ka ba kadi ti saria koos ka li a kuꞌum. Ka lina niŋ ye ti da tiaꞌ ti meŋ paŋa, ka lee tiaꞌane Winaꞌam one vuꞌugid kum la. 10 O faaenn ti yeltoog titaꞌar line a kuꞌum la ni, ka ti miꞌ ye o na lem faaenn ti, ka mor tiꞌir o saꞌan ye o na lem faaenn ti yaꞌas. 11 Ka yanam me suŋi ti n sos Winaꞌam tisi ti la. Winaꞌam na diꞌe ya sosug la bedego ka tisi ti yelsum. Dinzugo nidib bedego na puꞌus Winaꞌam bareka on niŋ siꞌel tisi ti la zug.

12 Tinam nweꞌed nyoꞌog neꞌeŋa yela bozugo ti potenda dit kaset ye ti nyaŋe gbanꞌe ti meŋ dunia nwa ni. Line gaad li wusa ane tinam ne yanam soogin. Li yi ne Winaꞌam a suꞌum nyain ne yelsida daan la yela. Li ane Winaꞌam popielim zug ka kaꞌane ninsaalib yaꞌam ka ti be ala laa. 13 Ti yiti sobidi lin maꞌaa ka ya na nyaŋe karem ka gbanꞌe li gbin. 14 Ya daa gbanꞌe lin ka ti daa niŋ la gbin ka pu gbanꞌe li wusa suꞌuŋaa. Ka m mor tiꞌir ye ya na gbanꞌe lin ka ti sob la suꞌuŋa ye Yesu Kiristo ken daar la ka yanam na nweꞌe nyoꞌog tinam yela wuu tinam na nweꞌe nyoꞌog yanam yela siꞌem la.

15 M daa miꞌ neꞌe suꞌuŋa ka linzug ka m daa gbanꞌe ye m na kena kaae ya yiiga ye ya di nyood noor ayi. 16 M daa gbanꞌe ye m na keenn ya saꞌan na ka nyaan gaad keŋ Masedonia teŋin, ka m yaꞌa ti lebid na ka na len kaae ya ka ya na suŋi m ka m gaadi keŋ Juuda teŋin. 17 Ya tenꞌes ye m gbanꞌar la kaꞌa suꞌuŋa bee? Ya tenꞌes ye m dolne ninsaalib boodim n gbanꞌe ye m niŋ siꞌel ka bood ye m kpanbi siak ye eenn ne ayei nee?

18 Winaꞌam ane yelsida sob, ala men ka li a sida ye tiname yeti ya siꞌel la kaꞌane ye ti kpanbidi siakid ye eenn ne ayei nee. 19 Yesu Kiristo one a Winaꞌam Biig ka mam, Paul ne Timoti ne Silvanus daa mool o yela ya saꞌan la, pu mor biꞌesugo. Li ane eenn o saꞌan saŋa wusa. 20 Li yine Yesu Kiristo ni na ka Winaꞌam siak ye eenn, ye o na niŋ lin ka o ziꞌel noor li yela la wusa. Ka linzug ka ti puꞌusug poogin ka li yine Yesu Kiristo ni ka ti yel ye ami, ka tisid Winaꞌam naꞌasi. 21 Li ane Winaꞌam ket ka ti ziꞌe kiŋ kiŋ Kiristo saꞌan tinam laꞌam ne yanam, ka gaŋi ti ye ti tum o tuuma, 22 ka nok o zanbin zanbili ti ka li paꞌal ye one soꞌe ti ka tisi ti o Siig Suŋ n ke ka ti miꞌ suꞌuŋa ye o na ti tisi ti o piini wusa.

23 Winaꞌam aa m kaset sob ye man pu leb Korint la, m faann ya yak. 24 Ti pu mood ye ti yeli ya ne mugusug line nar ye ya siak laa; ka ya yadda niŋir dol suer suꞌuŋa. Ti tum ne taaba ye ya nye sumalisim.