1 M daa gbanꞌe ye m ku lem kena kaae yaa n ke ka ya sunf saꞌam. 2 Ka m yaꞌa ket ka ya sunf saꞌamid, anoꞌone be na tisi m sumalisim? Soꞌo kaeꞌ, asee yanam bane ka m ke ka ya sunf saꞌam la. 3 M daa pu bood ye nimbane naan tisini m sumalisim la keen ka m moren susaꞌaŋa, ka linzug ka m daa sob gbauŋ kan la wala. M miꞌ ya suꞌuŋa ka miꞌ ye mam yaꞌa mor sumalisim, yanam me na mor, 4 ka daa sob tisidi ya ka mor susaꞌaŋ ne daamug m sunfin bedego, ka li ke ka m kaas, ka li kaꞌa ye m bood ye m ke ka ya sunf saꞌam, ka ane ye m ke ka ya baŋ man noŋi ya siꞌem bedego.

5 Nid yinni ya soogin yaꞌa daa ke ka soꞌ sunf saꞌam, li kaꞌane ye o saꞌame man sunfo, amaa o saꞌam ne yanam sunf biꞌela. M pu bood ye m yel ye o saꞌam ne ya sunf bedegoo. 6 Saansug kan ka ya bedego tis on daana la, zemiseya. 7 Nannanna li nar ka ya di o suguru ka kpeꞌeŋ o sunf, ka li da ke ka o sunf saꞌam bedego ka o saꞌam. 8 M belimi ya ye ya ke ka o lem baŋ ye ya sid noŋ o. 9 M daa sob gbauŋ kaŋa neꞌ zug ye m kpansi ya gos ye ya yiti siak man yeti ya siꞌel la. 10 Ya yaꞌa di soꞌ suguru, mam me na di o daana suguru men. Tuumbeꞌed siꞌa yaꞌa daa be ka zabi mam ka li ane man na dii li suguru, m niŋi li Kiristo tuon yanam zug 11 ye Sutaana da nyaŋe tii. Ti miꞌ on bood ye o niŋ siꞌel la.

12 Man daa paae Troas teŋin ye m mool Kiristo labasuŋ la, ka nye ka Zugsob la pun tiꞌeb suesuŋi digil. 13 Ka m sunf pu malisa man pu nye m baꞌabiig Titus anina la zug. Ka dinzug ka m kees nidib la ka gaadi keŋ Masedonia teŋin.

14 M puꞌus Winaꞌam bareka. Tiname a yinni ne Kiristo la, ka Winaꞌam yiti dolisidi ti ka li wenne ti laꞌasne n tuunl taaba ka doli Kiristo ken, n paꞌal ye o di yaꞌan n nyaŋ siꞌel wusa. Winaꞌam noki ti n ke ka nidib wusa baŋ Kiristo yela. Ka ti wenne nyuug line malis ka yadig zinꞌis wusa, 15 ka wenne tudaare ka Kiristo nyuꞌe li tis Winaꞌam, ka nimbane nye faangir la ne bane bodig la na wumi li nyuug. 16 Bane bodig la saꞌan li wenne nyuug beꞌed line a kuꞌum n tisi ba. Amaa li wenne nyuug suꞌum line a nyovur n tis bane nye faangir la. Anoꞌon nar ne yel kaŋa? 17 Nidib bedego mool Winaꞌam labaar wuu bane kuosid laꞌad dine kaꞌa suꞌum ka bood ligidi bedego la. Tinam kaꞌ ala. Amaa Winaꞌam tumi ti la zug ka ti pianꞌad Winaꞌam tuon n a yinni ne Kiristo.