1 Yela ban ka Yesu Kiristo daa nie paꞌal o tumtumnib la sobne gbauŋ kaŋa ni. Winaꞌam daa tis o yelbama ye o bigis Winaꞌam tumtumnib lin ku yuuge ka yelbane na kena. Kiristo daa tumne o malek o tumtum Joon saꞌan ka o yel o yelbama. 2 Joon daa yel bun lin ka o nye la wusa. Ka neꞌeŋa wusa ane labaar kane yi Winaꞌam saꞌan na la, ne yelsida lin ka Yesu Kiristo daa yiis la. 3 Yelsum be ne one karem Winaꞌam noor pianꞌauk kane ka o nodiꞌes daa pianꞌ la ne bane wumi li ka siak bun line sob gbauŋ kaŋa nwa ni la. Bozugo saŋa la liꞌeliya ka neꞌeŋanam na niŋ.

4 Man Joon sobid gbauŋ kaŋa n tisid Winaꞌam nidib bane laꞌas teensa ayopoi bane be Asia soꞌolimin la.

Winaꞌam one da be, ka kpelim be, ka na ti be sa ne siisa ayopoi bane be o naꞌam tuon la, 5 ne Yesu Kiristo one yet Winaꞌam yela ne sida ka a one da vuꞌug kumin yiiga la ka a dunia naꞌanam naꞌab la na tisi ya yelsum ne sumalisim.

Yesu Kiristo noŋi ti ka kpi ka o ziim yi ye o yiisi ti ti tuumbeꞌedin 6 ka ke ka ti a naꞌanam ne maalmaanib ye ti tum n tis o Baꞌ Winaꞌam. O na nye zunꞌor ne naꞌam saŋa dine kaꞌ benne. Ami.

7 Gosimi, one kenna ne saŋgbana la. Soꞌ mekama na nye o, laꞌam ne bane kuns o la men. O yaꞌa ti kena, dunia buudi wusa na kum ban zot o la yela. Sida, li na niŋ.

8 Zugsob Winaꞌam la a one mor paŋ wusa ka da be, ka be, ka na ti be la yel ye, “Mane a Alfa ne Omega, ka a siꞌel wusa pinꞌilug ne li naar.”

9 Man Joon ane ya baꞌabiig one laꞌas ne ya Yesu soꞌolimin, ka dit fara ka modigid ne ya, tinam a yinni ne Yesu la zug. Man daa moon Winaꞌam pianꞌad ka yet man miꞌ siꞌel Yesu Kiristo yela la zug, ka ba daa more man keŋ Patmos teŋ kane ka kuꞌom giligi li la. 10 Alasidaar line a Zugsob la dabisir la, Winaꞌam Siig Suŋ la daa kpenꞌ m, ka m wum kukor titaꞌar line kum wuu naꞌatani piebidi m nyaꞌaŋ.

11 Ka li daa yel ye, “Som lin ka fu nyet la digil, ka zaŋ gbauŋ la n tolimi tis Winaꞌam nidib bane laꞌas teensa ayopoi la, ka a Efesus ne Smirna ne Pergamum ne Tiatira ne Sardis ne Filadelfia ne Laodisea dim la.”

12 Man fendigi ye m gos ye anoꞌone pianꞌade tisidi ma, ka nye salima fitla ayopoi. 13 Ka soꞌ ziꞌe ba soogin wenne Ninsaal Biig ye fuug line waꞌami paae o noba. Ka salima senbidiŋ loo o nyoꞌog. 14 Ka o zuobid daa pelig wenne guŋgum bee sakuga ne. Ka o nini wenne bugum pielim ne. 15 Ka o noba nyeen wenne anzurifa ka ba nyeligi li bugumin n ke ka li maꞌae ka ba sasi li ka li lieb nyain. Ka o kukor vuud wenne kuꞌomi zot ka suꞌugid ne paŋ siꞌem la. 16 Ka o mor nwadibibisa ayopoi o datiuŋ nuꞌugin. Ka suꞌuraug line dit tuon ne nyaꞌaŋ yi o noorin na. Ka o nindaa nyeen wenne nintaŋ soos winig ne.

17 Man daa nye o la m daa igini o tuon ka wenne niŋkane kpi ne. Ka o daa zaŋi o datiuŋ nuꞌug n paꞌali m zug ka ye, “Da zot dabiem. Ka mane a yiiga ne nyaꞌaŋ daan la. 18 Mane a one voe la. M daa kpine, amaa m yuꞌun voe saŋa dine kaꞌ benne, ka soꞌe kuꞌum ne kuꞌum teŋ wusa.

19 “Dinzug, som bun lin ka fu nyet, line be nannanna, ne line na ti niŋ nyaꞌaŋ. 20 Nwadibibisa ayopoi line ka fu nye m datiuŋ nuꞌugin ne salima fitla ayopoi la yelsuaꞌada la gbin ane anwa. Nwadibibisa ayopoi la ane Winaꞌam nidib bane laꞌas zinꞌisa ayopoi la maleknam, ka fitla ayopoi la a Winaꞌam nidib bane laꞌas zinꞌisa ayopoi la.”