2
Kiristo toluŋ kane a Efesus dim din la yela
1 Ka man nye soꞌ la one yel man ye, “Som neꞌeŋa n tis malek one be Winaꞌam nidib saꞌan n be Efesus teŋin la. Neꞌeŋa ane toluŋ dine yi one mor nwadibibisa ayopoi o datiuŋ nuꞌugin la na, one ken salima fitla ayopoi soogin la.
2 Toluŋ la nwa. ‘Man miꞌ yanam niŋid siꞌel, ka miꞌ yanam tum ne kpiꞌeuŋ siꞌem, ka mor sumodigir siꞌem, ka miꞌ ye ya zanꞌasid nimbeꞌednam, ka daa mak bane ye ba ane Kiristo Tumtumnib la gos, ka lee baŋ ye ba kaꞌa alaa, ka baŋ ye ba ane ziri dim. 3 M miꞌ ye ya modigid ka namisid man zug ka pu basida. 4 Amaa mane nye ya taal siꞌem ane anwa. Ya pu noŋi m wuu yaname daa noŋi m yanam daa pinꞌili doli m yiiga siꞌem laa. 5 Tenꞌesimi yaname daa niŋid siꞌem ka yuꞌun basi li la. Tiakimi ya tuuma ka tum yaname daa tum siꞌem yiiga la. Ya yaꞌa pu tiake ya sueyaa, m na keenn ya saꞌan na n noki ya fitla la li zinꞌigin. 6 Amaa neꞌeŋa ka ya niŋid ka li a suꞌum. Ya kis line ka Nikolaitan nidib la niŋid, wenne mane kis li siꞌem la.
7 One bood ye o wum, ala on kelisimi line ka Winaꞌam Siig Suŋ la yet Winaꞌam nidib la. One nyaŋ yelbeꞌed wusa la ka m na tis o suer ka o di tiig line tisid nyovur ka be Winaꞌam lomboꞌogin la wela.’ ”
Kiristo toluŋ kane a Smirna dim din la yela
8 Ka man nye soꞌ la lem yeli m ye, “Som neꞌeŋa tis malek one be Winaꞌam nidib saꞌan n be Smirna teŋin la. Neꞌeŋa ane toluŋ line yi one a yiiga ne nyaꞌaŋ daan la na, one da kpi ka lem vuꞌug la.
9 Toluŋ la nwa. ‘M miꞌ ya namisug yela, ka miꞌ ye ya ane noŋ dim, amaa sida ya ane kpaꞌam dim, ka miꞌ pianꞌabeꞌed din ka bane yel ye ba ane Jew dim ka kaꞌ ala la pianꞌade ya yela. Ba ane Sutaana nidib. 10 Da zo yaname ye ya di fara siꞌa la dabiem. Kelisimi. Sutaana na ke ka ba kpenꞌesi ya sarega ni maki ya, ka ya na nye namisug dapiiga. Niŋimini m yadda hale ne ya kum, ka m na tisi ya piini line a nyovur.
11 One bood ye o wum, ala on kelisimi line ka Winaꞌam Siig Suŋ la yet Winaꞌam nidib la. One nyaŋ yelbeꞌed wusa la, kum kane paasida ayi la ku niŋ o siꞌela.’ ”
Kiristo toluŋ kane a Pergamum dim din la yela
12 Ka man nye soꞌ la lem yeli m ye, “Som neꞌeŋa n tis malek one be Winaꞌam nidib saꞌan n be Pergamum teŋin la. Neꞌeŋa ane toluŋ kane yi one mor suꞌuraug dine ka li tuon ne nyaꞌaŋ wusa dit la na.
13 Toluŋ la nwa. ‘M miꞌ ye yaname be siꞌel la ane zinꞌikan ka Sutaana naꞌam gbauŋ be. Amaa ya sid doli m, hale saŋa kan ka ba daa ku Antipas one sid diti m kaset tisid nidib la, zinꞌikan ka Sutaana be la ya ni, ya daa kpelim niŋidi m yadda. 14 Amaa ya taal ane anwa biꞌela. Sieba bee ya ni ka dol Balaam paꞌalug one da paꞌal Balak on na niŋ siꞌem ke ka Israel dim tum tuumbeꞌed. O da ke ka ba di baꞌar diib, ka me ke ka dap ne poꞌab saꞌam taaba. 15 Ala men, yanam me mor nidib ya ni ka ba dol Nikolaitan dim paꞌalug. 16 Tiakimini ya sueya. Yaꞌa kaꞌ alaa, m na kena zab ne nimban dim ne suꞌuraug dine line na yi m noorin na la.
17 One bood ye o wum, ala on kelisimi line ka Winaꞌam Siig Suŋ la yet Winaꞌam nidib la. One nyaŋ yelbeꞌed wusa la ka m na tis o diib line yit saazug na la sieba ka o di, ka tisi ba wusa yinni yinni kugpiel line zug ka yuꞌur paal sob, ka soꞌ ziꞌi lii, asee one diꞌe li la.’ ”
Kiristo toluŋ kane a Tiatira dim din la yela
18 Ka man nye soꞌ la lem yeli m ye, “Som neꞌeŋa tis malek one be Winaꞌam nidib saꞌan n be Tiatira teŋin la. Neꞌeŋa ane toluŋ kane yi Winaꞌam Biig one nini wenne bugum pielim ne, ka o noba nyeen wenne anzurifa line ka ba sas ne.
19 Toluŋ la nwa. ‘M miꞌ ya tuuma ne ya noŋilim ne ya yadda niŋir ne yaname niŋid siꞌel laꞌam ne ya sumodigir, ka lem miꞌ ye ya tum nannanna gat yaname daa deŋi tum yanam daa pinꞌili doli m siꞌem la. 20 Amaa mane nye ya taal siꞌem nwa. Ya siak Jezebel one a poꞌa ka yel ye o ane Winaꞌam nodiꞌes la, ka o bee ya ni, ka paꞌan ka maꞌadi m tumtumnib, ka poꞌab ne dap saꞌamid taaba, ka dit bada diib. 21 M tis o saŋa ye o tiak o tuumbeꞌed, amaa o pu bood ye o bas o tuumbeꞌed laa. 22 Dinzug m na ke ka o digin ne namisug. Ka bane laꞌas ne o n tum tuumbeꞌed la, yaꞌa pu bas ba tuumbeꞌed la, ban me na namis bedego. 23 M na ke ka o biis kpi. Ka Winaꞌam nidib wusa na baŋ ye mane a one miꞌ nidib potenda ne ba boodim la, ka yo soꞌ mekama wusa o tuuma yood. 24 Amaa ya sieba bane be Tiatira ka pu dol paꞌalkaŋaa, ka me pu zamis line ka sieba buon Sutaana yelsuaꞌada laa, m ku mor yeel sieba ziꞌili ya. 25 Amaa ya gbanꞌam line ka ya mor la kiŋ kiŋ hale ne man na ti kena. 26-27 One nyaŋ yelbeꞌed wusa la, ka kpelim niŋid man boodim, ka kudin ku basi, m na tis o paŋ kan ka m diꞌe m Baꞌ Winaꞌam saꞌan la buudi, ka na tis o teens wusa paŋ ka o na soꞌe ba ne paŋ ka saꞌami ba, wenne one mor kunt dansaar nwaꞌad duguda ka li liebid sawies ne, 28 ka me tis o bekeeung nwaddar la.
29 One bood ye o wum, ala on kelisim dine ka Winaꞌam Siig Suŋ la yet Winaꞌam nidib la.’ ”