23
1 Katta ǝrbab bilǝn ⱨǝmdastihan bolsang,
Aldingdiki kim ikǝnlikini obdan oylan.
2 Ixtiying yaman bolsa,
Gelingƣa piqaⱪ tǝnglǝp turƣandǝk ɵzüngni tart.
□ 3 Uning nazunemǝtlirini tama ⱪilma,
Ular adǝm aldaydiƣan tamaⱪlardur.
4 Bay bolimǝn dǝp ɵzüngni upratma;
Ɵzüngning zeⱨningni bu ixⱪa ⱪaratma.
□ 5 Bayliⱪlarƣa kɵz tikixing bilǝnla, ular yoⱪ bolidu;
Pul-mal dǝrwǝⱪǝ ɵzigǝ ⱪanat yasap,
Huddi bürküttǝk asmanƣa uqup ketǝr.
6 Aq kɵzning nenini yemǝ,
Uning esil nazunemǝtlirini tama ⱪilma;
7 Qünki uning kɵngli ⱪandaⱪ bolƣandǝk, ɵzimu xundaⱪ.
U aƣzida: — Ⱪeni, alsila, iqsilǝ! — desimu,
Biraⱪ kɵnglidǝ seni oyliƣini yoⱪ.
8 Yegǝn bir yutum taamnimu ⱪusuwetisǝn,
Uningƣa ⱪilƣan qirayliⱪ sɵzliringmu bikarƣa kǝtkǝn bolidu.
9 Əhmǝⱪⱪǝ yol kɵrsitip salma,
Qünki u ǝⱪil sɵzliringni kɵzgǝ ilmas.
■
10 Ⱪǝdimdǝ bekitkǝn yǝrning pasil taxlirini yɵtkimǝ,
Yetimlarning etizliriƣimu ayaƣ basma;
■ 11 Qünki ularning Ⱨǝmjǝmǝt-Ⱪutⱪuzƣuqisi intayin küqlüktur;
U Ɵzi ular üqün üstüngdin dǝwa ⱪilar.
□
12 Nǝsiⱨǝtkǝ kɵngül ⱪoy,
Ilim-bilimlǝrgǝ ⱪulaⱪ sal.
13 Balangƣa tǝrbiyǝ berixtin erinmǝ;
Əgǝr tayaⱪ bilǝn ursang, u ɵlüp kǝtmǝydu;
■ 14 Sǝn uni tayaⱪ bilǝn ursang,
Bǝlkim uni tǝⱨtisaradin ⱪutⱪuziwalisǝn.
□ 15 I oƣlum, dana bolsang,
Mening ⱪǝlbim ⱪanqǝ hux bolar idi!
16 Aƣzingda orunluⱪ sɵzlǝr bolsa, iq-iqimdin xadlinimǝn.
□
17 Gunaⱨ sadir ⱪilƣuqilarƣa rǝxk ⱪilma,
Ⱨǝrdaim Pǝrwǝrdigardin ǝyminixtǝ turƣin;
■ 18 Xundaⱪ ⱪilƣiningda jǝzmǝn kɵridiƣan yahxi kününg bolidu,
Arzu-ümiding bikarƣa kǝtmǝs.
■
19 I oƣlum, sɵzümgǝ ⱪulaⱪ selip dana bol,
Ⱪǝlbingni Hudaning yoliƣa baxliƣin.
20 Mǝyhorlarƣa arilaxma,
Nǝpsi yaman gɵxhorlar bilǝn bardi-kǝldi ⱪilma;
■ 21 Qünki ⱨaraⱪkǝx bilǝn nǝpsi yaman ahirida yoⱪsulluⱪta ⱪalar,
Ƣǝplǝt uyⱪusiƣa patⱪanlarƣa jǝndǝ kiyimni kiygüzǝr.
22 Seni tapⱪan atangning sɵzini angla,
Anang ⱪeriƣanda uningƣa ⱨɵrmǝtsizlik ⱪilma.
■ 23 Ⱨǝⱪiⱪǝtni setiwal,
Uni ⱨǝrgiz setiwǝtmǝ.
Danaliⱪ, tǝrbiyǝ wǝ yorutuluxnimu al.
■
24 Ⱨǝⱪⱪaniy balining atisi qong huxalliⱪ tapar;
Dana oƣulni tapⱪan atisi uningdin hursǝn bolar.
■ 25 Ata-anangni sɵyündürüp,
Seni tuƣⱪan anangni hux ⱪil.
26 I oƣlum, ⱪǝlbingni manga tapxur;
Kɵzliringmu ⱨayatliⱪ yollirimƣa tikilsun!
27 Qünki paⱨixǝ ayal qongⱪur oridur,
Buzuⱪ yat ayal tar zindandur;
■ 28 Ular ⱪaraⱪqidǝk mɵküwelip,
Insaniyǝt arisidiki wapasizlarni kɵpǝytǝr.
29 Kimdǝ azab bar? Kimdǝ dǝrd-ǝlǝm? Kim jedǝl iqidǝ ⱪalar? Kim nalǝ-pǝryad kɵtürǝr? Kim sǝwǝbsiz yarilinar? Kimning kɵzi ⱪizirip ketǝr?
30 Dǝl xarab üstidǝ uzun olturƣan,
Əbjǝx xarabtin tetixⱪa aldiriƣan mǝyhorlar!
■ 31 Xarabning ajayib ⱪizilliⱪiƣa, uning jamdiki julaliⱪiƣa,
Kixining gelidin xundaⱪ siliⱪ ɵtkǝnlikigǝ mǝptun bolup ⱪalma!
32 Ahirida u zǝⱨǝrlik yilandǝk qeⱪiwalidu,
Oⱪ yilandǝk nǝxtirini sanjiydu.
33 Kɵz aldingda ƣǝlitǝ mǝnzirilǝr kɵrünidu,
Aƣzingdin ⱪalaymiⱪan sɵzlǝr qiⱪidu.
□ 34 Huddi dengiz-okyanlarda lǝylǝp ⱪalƣandǝk,
Yǝlkǝnlik kemining moma yaƣiqi üstidǝ yatⱪandǝk bolisǝn.
35 Sǝn qoⱪum: — Birsi meni urdi, lekin mǝn yarilanmidim!
Birsi meni tayaⱪ bilǝn urdi, biraⱪ aƣriⱪini sǝzmidim!» — dǝysǝn.
Biraⱪ sǝn yǝnǝ: «Ⱨoxumƣa kǝlsǝmla, mǝn yǝnila xarabni izdǝymǝn! — dǝysǝn.