1 Naa7ima biittaappe yiida Xoofaari hagaadan yaagidi zaariis; 2 “Ne haasayai tana lanccissido gishshau, taani ainne takkennan ne haasayaayyo zaaruwaa immana. 3 Ne cashsha haasayaa taani siyais; siyin ayyo bessiya zaaruwaa tana imma imma gees.

4-5 “Asa biittaa bolli wottido wodiyaappe doommidi, beniisappekka nagaranchcha asatu ceeqoi qantta wodiyaassa gidiyoogaa, Xoossaa erenna asatu ufaissaikka liphida aifee xeellanaashiina gidiyoogaa neeni eraasa. 6 Iita asi shaaraa gakkanaashin aduqqikkokka, 7 i buhiyaadan pitetti xayana. A eriya ubbai, ‘I awan de7ii?’ yaagana. 8 Aimuwaadan i paalli xayana; simmidikka beettenna; qammaa ajjuutaadan i xayi bayana. 9 A be7ida aifeti naa77anttidi, a be7okkona; i ba de7iyoosaappekka tippi giidi xayana. 10 Iita aawai bonqqi ekkido miishshaa a naati bantta kushiyan guyye zaarana. 11 Payyanne mino gidiya a bollai guutta wodiyaappe guyyiyan, biitta kiyana.

12 “Iita asa doonan iitatettai qumadan laqilaqikkokka, i ba inxxarssaappe garssa baggaara genttikkokka, 13 wurennaadan ba doonan coommiiddi, wotti bayikkokka, 14 a ulo giddon a qumai laamettana; laamettidi woriya shooshshaa yiishshaa mala au gidana. 15 Iita asi ba mittido duretettaa haa cuchchana; a uluwaappe Xoossai cooshshidi kessana. 16 Iita asi mittiyoobai au yiishsha gidana; shooshshaa yiishshaa mala gididi, a worana. 17 Eessainne maattai haattaadan goggishin, i be7ennan haiqqana. 18 Ba daafurido daafuraa cawaa meennan, haraassi sheedhdhana; zal77idi worissido ba woriyankka ufaittenna. 19 Aissi giikko, hiyyeesata i un77ettiis; eta shenehoo giis; hara asi keexxido keettaakka bau ekkiis.

20 “A yiiqiyau zawi baawa; ba dosiyoobaa xarzzanau danddayenna; 21 i miidoogaappe guyyiyan, aibinne attenna. Hegaa gishshau, a duretettai gam77enna. 22 I daro aquwaa demmiyo wode, metoi akeekennan a bolli gakki wodhdhana. 23 I miidi kallishin, Xoossai a qaxxayanau ba suulliya hanqquwaa a bolli gussana. 24 Birata bisuwaappe i baqatana; shin nahaasiyaa zubbee a caddana. 25 He zubbee ayyo zokkuwaara kantti kiyana; he phooliyaa xeerai a tiriyaa kanttidi, ciyyiyaa gussana. Hegaa gishshau, dagamai a wozanaa shabbirana.

26 “I shiishshido aqo ubbai xayana; asi eettibeenna tamai a maana; a keettan attida asai ubbaikka taman meetettana. 27 Saloti ha bitaniyaa nagaraa qonccissana; biittaikka a bolli markkattana. 28 Xoossai hanqqettidi ehiyo beetan a keettainne ayyo de7iyaabai ubbai shohettidi baana. 29 Xoossai iita asatuyyo wottido qaadai hagaa” yaagiis.