1Do nakadiman danaw ni Ehod, minirwa dana saw Israelitaw a mamarin so marahet do salapen ni ĀPO. 2Dawa, inpasākop sa ni ĀPO di Jabin a asa āri dan Kananeo a magtoray do Hasor.* Iyaw komander no bōyot naw, ki si Sisera a omyan do Haroset-hagoyim. 3Sinpangan na, tomnanyis saw Israelitaw a napasidong di ĀPO. Ta si Jabin, myan sasyam a gasot a pasek a logan na a pachigobat, kan siraranggas a nangitoray siras Israelitaw do irahem no dadwa poho a katawen.

4Si Deborah a asa propīta a baket ni Lappidot, ki magsirsīrbi a okom dan Israelitaw do dāwri a chimpo. 5No dadakay na, ki maydisna do sirokaw no palma do payawan no Rama kan Betel do katokotokonan no Epraim. Dawriw nangayan dan Israelitaw a mangipaokom dya an myan paydidimanan da. 6Asa karaw, inpatawag na si Barak a pōtot ni Abinoam a taga Kedes do Naptali, kan binata na dya a kāna, “Si ĀPO a Dyos no Israel, manmandaran naymo a kāna, ‘Mangyangay ka so asa poho a rībo a mahahakay a yapo do trībo daw da Naptali kan Sabalon, as idaōlwan mo sa do Tokon a Tabor. 7Apānan konchi tan mangay dyimo a machigobat si Sisera a komander no bōyot ni Jabin do Oksong Kison. Iyangay na sanchiw logan na saw a pachigobat kan bōyot na saw, ki iparawat konchi iya dyimo.’ ”

8Inatbay ni Barak a kāna, “Mangay ako an machangay ka dyaken. Ki an dyi ka machangay, mangay akwaba.”

9Binata ni Deborah a kāna, “Naon, machangay ako dyimo. Ki maynamot ta komwan pamosposan a pinidi mo, dyira mwabaw dāyaw, ta iparawat anchi ni ĀPO si Sisera do asa mabakes.” Do dāwri, nachangay si Deborah di Barak do Kedes. 10Tinawagan ni Barak tawotawowaw no trībo no Sabalon kan Naptali a mangay do Kedes. Asa poho a rībo a mahahakay minonot dya, as nachangay dya si Deborah.

11Ki si Heber a asa Kenita,† ki nachisyay dyirad kadwan saw a Kenita, kan nagtolda do masngen do logar a kayo a logo do Saanannim a masngen do Kedes. Siraw Kenita, ki kapotōtan dan Hobab a katogāngan ni Moyses a mahakay.‡

12Do nakadāmagaw ni Sisera a somnonget si Barak a pōtot ni Abinoam do Tokon a Tabor, 13chinpeh na saw tabo sasyamaw a gasot a pasek a logan na a pachigobat kan tābo bōyot na yapo do Haroset-hagoyim a manda do Oksong Kison.

14Do dāwri, binata ni Deborah di Barak a kāna, “May ka na! Ta sicharaw, iparawat ni ĀPO si Sisera dyimo, ta si ĀPO nanmanma kan imo.” Dawa, minosok si Barak yapo do Tokon a Tabor, kan minonot sa dyaw asa a poho a rībo a mahahakay. 15Do nakadarop daw da Barak kan bōyot na saw, pinaytalangkyaw ni ĀPO si Sisera kan tābo bōyot na a aran siraw myanaw do logan a pachigobat. Kinarwan ni Siseraw logan naw, as nayyayo. 16Ki linakatan da Barak logan da saw a pachigobat kan bōyot saw ni Sisera a manda do Haroset-hagoyim, as inispāda da sa diniman tābo bōyot ni Sisera. Abaw aran asa nabidin a nabyay.

17Si Sisera, ki nayyayo do tolda ni Jael a baket ni Heber a asa Kenita, ta myan kapya da Āri Jabin do Hasor kan partīdos ni Heber. 18Binayat ni Jael si Sisera, kan binata na dya a kāna, “Somdep ka mo āpo. On, somdep ka do tolda kwaya. Mamo kaba.” Dawa, somindep si Sisera, kan intayo ni Jael do dyichodanaw no kortina.§

19Binata ni Sisera dya a kāna, “Minom ako pa so ranom, ta mawaw akwaya.” Tinorohan nas inomen na gātas a naisopot do lālat, kan pinirwa na a intayo. 20As inbahey na pa dya a kāna, “Maytēnek ka pa do pantawaya no tolda. An myan mangay kan mangyahes dyimo an myan tawo dya, ibahey mo a, ‘Aba.’ ”

21Do nakapaynepdep danaw ni Sisera do oltimo a nakahopag na, kinadomyan ni Jael naypasngen a sii-igpet so rongsoh kan pāsok no tolda. Inlansa naw pāsokaw no tolda do kamnemnekaw ni Sisera kan nayhawos a nanda do tana. Do dāwri, nadiman. 22Sinpangan na, do nakawaraw ni Barak do kalakat naw si Sisera, minohtot si Jael a nangbayat sya. Binata na di Barak a kāna, “May ka pa dya! Cha dyaw tawowaw a chichwasen mo.” Dawa, nachisdep dya do toldaw, kan dawri naboya na si Sisera a nadiman a naipāsok so kamnemnek.

23Do dāwri a araw, do sidong ni Āpo Dyos, inābak dan Israelitaw si Jabin a āri no Kanaan. 24Yapo do dāwri a araw, naypaypabīleg saw Israelitaw a kalāban ni Jabin a āri no Kanaan a manda do nakarārayaw da sya.