1Nahay aba, do chimpo no kapagranyi so trīgo,* inhap ni Samson asaw a orbon a kalding a pangrigālo na, kan yangay na pinasyar si baket na. Do nakapakarapit naw do bahayaw, binata ni Samson di katogāngan na a mahakay, “Chakey kwayaw somdep do kwarto ni baket ko.” Ki pinalobōsan naba somindep.

2Binata na di Samson, “Ay na, no myanaw do aktokto ko, ki taywara mwa inipsok. Dawa, intoroh kwaw do rārayay mwaw. Ki mapinpintasaw ādi naw. Iya danaw kabahayen mo ah?”

3Binata ni Samson dyira, “Changori, mapagatos nyo paba yaken, inyo a Pilisteo anchan paynyinan koynyo!” 4Dawa, nangay a nanganop so tatdo a gasot a bolaw a chito, as pinayiyitan na a pinagpaparis ipos daw kan nangireppet daw so bonot. 5Sinpangan na, pinasdeb naw bonotaw, as nakaari na siras bolaw saw a chito do rānyen daw no Pilisteo. Nasosohan saw rinānyi daw kan ranyen da saw a myan pa do bengkag kontodo kaobāsan saw kan kaolibwan saw. 6Maynamot ta komwan, inyahes dan Pilisteowaw, “Sino paro namarin syay?” Naibahey dyira a, “Si Samson a manōgang no taga Timna, ta inhap no katogāngan naw si baket na, as nakaitoroh na sya do rārayay naw.” Dawa, nangay saw Pilisteowaw a nangsosoh a nangdiman so mabakesaw kan si āmang na.

7Binata ni Samson dyira a kāna, “Maynamot ta komwan pinarin nyo, ikari ko a magsardeng akwaba mandan dyi koynyo a mabahes!” 8Rinaot na sa a siraranggas, as diniman naw āro dyira. Katayoka naw, minosok a minyan do aschipaw do bato no Etam.

9Somnonget saw Pilisteowaw, as nagkampo sa do Joda, as kan rinaot daw idi a Lehi. 10Ki inyahes dan mahahakayaw no Joda dyira, “Āngo ta rinaot nyo yamen?”

Inatbay dan Pilisteowaw a kon da, “Nangay kami a mangbahod si Samson, as parinen namen dyaw akmas pinarinaw dyamen.” 11Dawa, tatdo a rībo a mahahakay do trībo no Jodaw, minosok do aschipaw do bato no Etam, kan binata da di Samson a kon da, “Chapatak mwabawri a siraw Pilisteowayaw mangitoray dyaten? Āngo ta pinarin mo dyiraw nya? Oh! Sichangori, nairamrāman kami!”

Tinbay na a kāna, “Tod kwa pinarin dyiraw mas pinarin daw dyaken.”

12Inbahey da dya a kon da, “Nangay kami dya tan yangay namen imwa bahoden, as kaiparawat namen dyimo dyirad Pilisteo saw.”

Binata ni Samson dyira a kāna, “Na, isapata nyo dyaken ah a dya inyo a mismo mangdiman dyaken.”

13Inatbay da a kon da, “Naon. Tod namen lang imwa bahoden, as kaiparawat namen dyimo. Dimanen namen aba imo.” Dawa, binahod das dadwa bayo a hobid, as nakahap da sya pinaybidi a yapo do batwaw.

14Do nakarapit naw do Lehi, nangagagay saw Pilisteo saw do kapayyayo daw a maypasngen dya. Ki do dāwri, pinabīleg no Ispirito ni ĀPO si Samson. Siraw hobidaw a pinamahod das tachay kan kakamay na, ki nayparin a akmay ohāngo a nasosohan kan tod a nasday do kakamay naw. 15Do dāwri, nakachichwas so bayobayo pa sanyi no asno, kinamet na, kan nawriw inosar na nangdiman so asaw rībo a mahahakay. 16Inkansyon ni Samson a kāna,

17Nakatayoka naw, inpoha naw tohangaw. Dawri a logar, ki natawagan so Ramat-lehi.‡

18Do dāwri, oyod naranas kawaw ni Samson. Intanyis na di ĀPO a kāna, “Imo, nanoroh dyaken a pachirawatan mo so nya rakoh a nakapangābak. Ki sichangori, madiman akori do kawaw ko, as tiliwen danchi yaken no dya nakōgit?” 19Dawa, napakbod Dyos so ranom a yapo do asa paydinsebanaw no tana do Lehi. Mininom si Samson so ranomaw kan naybidiw ayit naw. Dawa, napangaran akbodaw so En-hakkore§ a myan pa daw mandas changori.

20Indaōlwan san Samson Israelitaw do dadwa poho a katawen do chimpwaw no nakapangitoray dan Pilisteowaw dyira.