1 परमप्रभु यावे इन गाइक्‍तीकेमी आं कली महुइक्‍तीनी। इन चुरतीकेमी आं कली सजाइ मगेयीनी। 2 मारदे हना इन ब्राम आं कली देश्‍शो बाक्‍नीम। मिनु इन गुइमी आं कली चिप्‍शो बाक्‍ब। अय्‍युब ६:४ 3 इन गाइक्‍तीकेमी आं रां नेल्‍ल खाइश्‍शो बाक्‍ब। आं मरिम्‍शो पतीकेम आं रुश नेल्‍ल मुक्‍शो खोदेंशो बाक्‍नीम। 4 आं मरिम्‍शो पशोमी आं पिया सम्‍म ग्रुम्‍शो बाक्‍ब। मेको आं कुरने मचाप्‍चा ङा पा हेल्‍शो बाक्‍नीम। बिलाप १:१४;

5 आं निप्‍स काप्‍शो आ पर्बम आं गार राक्‍शा, रिना पाइश्‍शो बाक्‍नीम। 6 गो नाक्‍त रे आं पिया खुक्‍शा, रोंका पा गुर ब्‍वेशा गाक्‍शो बाक्‍नुङ। 7 आं ची नेल्‍ल खाइश्‍शो बाक्‍ब। आं रां नेल्‍ल सेस मबाक्‍ब। 8 गो गलाक गुलुक दुम्‍शा, काइ सक्ति मपाइश्‍शो दुम्‍शो बाक्‍ती। आं थुं ङा श्‍येतम शुश हुक‍यी पाइनुङ।

9 आं परमप्रभु, गे आं दाक्‍शो नेल्‍ल तुइश्‍शो बाक्‍नीनी। आं हुक‍यी पतीके यो तुइश्‍शो बाक्‍नीनी। 10 आं लुङगीर प्रेक्‍शा, आं सक्ति जाम्‍त। आं मिक्‍च ब्रा ब्रा दुम्‍शो बाक्‍ब। 11 आं वारच नु आं खिं ङा मुर आं श्‍येत तशा, ङोन बाक्‍नीम। मिनु आं नेक्‍था ङा मुरपुकीमी ङोन रे कोव़नीम। भजन संग्रह ६९:९; भजन संग्रह ८९:९; अय्‍युब १९:१३-१९ 12 आं कली साइक्‍चा माल्‍बपुकीमी ब्‍वारद दाइश्‍शा, वोइश्‍शो बाक्‍नीम। आं कली श्‍येत दुम्‍शो कोव़कोव़ दाक्‍बपुकीमी “मेको कली दोपा श्‍येत गेचा, दोपा मेको आ पर्बम जोल पचा” दे नाक्‍त रे लोव़ पाइनीम। 13 गो नोफा मनेंब मुर खोदेंशो दुम्‍ती, मनेंनुङ। ब्‍वाक्‍ने मचाप्‍ब मुर खोदेंशो दुम्‍ती, काइ लोव़ मपाइनुङ। भजन संग्रह ३९:९३ 14 गो थमा पा नोफा मनेंब खोदेंशो दुम्‍शा, मारेइ लोव़ मलेत्‍नुङ। 15 परमप्रभु यावे, गो इन कली रिम्‍नुङ। गे आं लोव़ लेत्‍नीनी। गे परमप्रभु यावे, आं परमप्रभु बाक्‍नीनी। 16 मिनु गो “मेकोपुकीमी आं पर्बम शुक्‍शी पा ग्‍येरचा मतामेक्‍ल। आं कली ग्रेक्‍शो तशा, बोरचा मतामेक्‍ल” देंती। 17 मारदे हना गो दाइल पांइसीचा चिक्‍शो बाक्‍नुङ। गो श्‍येत जस ङा जस बाक्‍नुङ। 18 गो आं काइ मरिम्‍शो पशो शोव़नुङ। आं मरिम्‍शो पशो मिम्‍शा सुर्ता पाइनुङ। भजन संग्रह ३२:५; 19 आं जोरी सत्रु चहिं रिम्‍शो पा ब्रोंइशा, बोल्‍यो दुम्‍शो बाक्‍नीम। आं कली मोशान मदाक्‍ब शुश बाक्‍नीम। 20 मुरपुकीमी आं रिम्‍शो पशो आ पा ङा आं कली मरिम्‍शो पाइ‍नीम। मारदे हना गो रिम्‍शो पाइब बाक्‍ती हना यो, आं कली खेदा पाइनीम। 21 परमप्रभु यावे, आं परमप्रभु, आं कली मप्रोंइयीनी। आं क्‍येङा ङोन मदुमीन। 22 परमप्रभु, आं कली वारच पाइश्‍शा, श्‍येत रे प्रोंइचा कली रीब पा जाक्‍कीन।