1 परमप्रभु, गो आं थुं नेल्‍लेमी इन कली ठेयब सेल्‍नुङ। गो देवी देवता आन ङोंइती इन कली ला ठेयब सेल्‍तीक कुम्‍सो पाइनुङ। 2 गो इन खिं गे बाप्‍शा, इन कली “गे रिम्‍शो पाइब बाक्‍नीनी” देंनुङ। मारदे हना इन गेना हना यो दाक्‍तीकेमी दाक्‍शा मप्रोंइनीनी। मिनु इन नें नु इन लोव़ नेल्‍ल आन क्‍येङा ठेयब बाक्‍नीम। 3 गो इन कली ब्रेङङानु, आं लोव़ लेत्‍ताक्‍यीनी। गे आं कली महिंब थुं गेशा, बोल्‍यो सेल्‍तीनी।

4 परमप्रभु यावे, रागी ङा पिप नेल्‍लेमी इन लोव़ नेंतेक्‍म। मोपतीके मेकोपुकीमी इन कली ठेयब सेल्‍मेक्‍ल। यसैया २:३ 5 मिनु मेकोपुकीमी परमप्रभु यावे आ लां आ पर्बम कुम्‍सो पामेक्‍ल। मारदे हना परमप्रभु यावे आ सक्ति थम ठेयब बाक्‍ब। 6 परमप्रभु यावे नेल्‍ल क्‍येङा ठेयब बाक्‍त हना यो, मेकोमी आइक्‍च मुर आन कली कोव़ब। तन्‍न ठेयब लेश्‍शो मुर आन क्‍येङा ङोन बाक्‍ब।

7 मिनु गो शुश श्‍येत जाता हना यो, गे आं कली प्रोंइनीनी। गे आं कली तशा आं जोरी सत्रु आन गाइश्‍शो रे प्रोंइ‍नीनी। गे इन सक्तिमी आं कली प्रोंइनीनी। 8 परमप्रभु यावेमी आं पर्बम आ पचा माल्‍शो नेल्‍ल पाइब। परमप्रभु यावे इन दाक्‍तीके गेना हना यो लीब। इन सेल्‍शो मुर, आं कली मप्रोनीन।