104
Dii Pↄ́pingikɛri táakilɛna
1 Ma swɛ̃̀, ǹ Dii sáabu kpá.
Dii ma Luda, ń bíta maamaa,
ń gakui dana pↄ́kãsãa ũ, èe tɛ́ kɛɛ,
2 n gupuraa kùnla lán bisa bà,
n musu kpàɛ lán pɛ̀ bà,
3 n bɛɛ bò ínↄla musu.
N ludambɛ luguu kɛ̀ n sↄ̃goro ũ,
nɛɛ̀ di ĩa ↄↄa.
4 Nɛɛ̀ ĩa kɛ n zĩ̀rinↄ ũ,
nɛɛ̀ tɛ́vura kɛ n zĩkɛrinↄ ũ.
5 N anduna kàɛ, n à kãsãa pɛ̀ɛ,
à nigãna vĩ zikiro.
6 N ísiaa dànɛ uta gumusu ũ,
í pì dà kpiiinↄla.
7 N kpãkɛ̃ í pìzi, ben à bàa lɛ̀,
n pataa, ben à nàguzi.
8 Kpiiinↄ bↄ̀ gupuraaa, guzurɛnↄ sↄ̃̀ɛ,
ben í tà guu kɛ̀ ń dìɛnɛn.
9 N lɛ́zɛkii dà í pìnɛ, eé fↄ̃ à vĩàlaro,
eé ɛara à da tↄↄtɛla ziki dↄro.
10 Nɛɛ̀ tó íbↄkiinↄ í pisi swa'ↄnɛnↄn,
ben à í ègↄ̃ bàa lɛɛ kpiiinↄ dagura.
11 Sɛ̃̀tɛ pↄ́ píngi ègↄ̃ à í mii,
à í è saginↄ í nii kɛ̃ḿma.
12 Bãanↄ è sà dↄ swaanↄ saɛ,
aↄ̃ègↄ̃ kú à dàko guu, aↄ̃ wiii ègↄ̃ dↄ.
13 Zaa n bɛ musu nɛɛ̀ lou gbarɛ kpiiinↄa,
n zĩ gbɛ̀ è anduna kã.
14 Nɛɛ̀ tó sɛ̃̀ bↄɛ pↄ́kãdeenↄnɛ,
nɛɛ̀ tó burapↄnↄ bↄɛ gbɛ̃nteenↄnɛ,
nɛɛ̀ pↄ́blee bↄɛńnɛ tↄↄtɛa,
15 geepiwɛ̃ɛ kɛ̀ è ń pↄↄ kɛ nnaa
kↄ̃n nↄ́si kɛ̀ è ń uu tɛ́ kɛɛo
kↄ̃n blɛɛ kɛ̀ è ń gba gbãaao.
16 Dii línↄ è mↄdↄ e maamaa,
sida lí kɛ̀ à bà Lɛbanↄnↄ.
17 Gwen bãanↄ è sà dↄdↄn,
zùbaaninↄ è bɛɛ dↄ pini lí musu.
18 Kpii lezĩnↄↄ dɛ kpasaanↄ kúkii ũ,
gbɛ̀kotoonↄ dɛ gbɛ̀'ɛ̃ɛnↄ utɛkii ũ.
19 N mↄvura kɛ̀ gurↄ tàasikɛbↄ ũ
kↄ̃n ↄfãntɛ̃ kɛ̀ à a gɛ̃na kpɛ́n gurↄↄ dↄ̃ↄo.
20 Nɛɛ̀ tó guu si, ben gwãavĩ è kɛ,
lákpɛpↄnↄ è fɛɛ táo píngi.
21 Músunↄ è nↄadɛna ↄ́ↄ dↄ,
aↄ̃è pↄ́blee wɛtɛ Ludaa.
22 Tó ↄfãntɛ̃ bↄ̀ɛ, aↄ̃è lↄↄtɛ
aↄ̃ tá daɛ ń tòn.
23 Gbɛ̃ntee è bↄ à gá zĩi kɛ,
ègↄ̃ yã ma a zĩndaa ai uusiɛ.
24 Dii, n yãkɛnanↄↄ pari fá!
À píngi bↄ̀ n ↄ̃ndↄ̃ↄ guumɛ,
anduna pana kↄ̃n pↄ́ kɛ̀ ń kɛ̀nↄ.
25 Ísia kuu, à bíta bensↄ̃ à yàasa,
pↄ́ bɛ̃ɛ kɛ̀ kú à guunↄ lɛ́ vĩro,
à nɛ́ngo kↄ̃n à bítao píngi.
26 Góro'itɛnↄ ègↄ̃ táa oon
kↄ̃n kúkukuu kɛ̀ ń kɛ̀ à kↄ̃kↄ̃ o à guuo.
27 Pↄ́ pìnↄ è wɛ́ɛ dↄnzi ń píngi
lɛ ǹ pↄ́blee kpáḿma a gurↄↄa.
28 Nɛɛ̀ kpáḿma, aↄ̃è sɛ́ɛ,
nɛɛ̀ ↄ porońnɛ, ben pↄ́ maaanↄ è mↄ́ḿma.
29 Tó n mìkpɛɛ zùńnɛ, aↄ̃è bídi kɛmɛ,
tó n wɛ̃̀ndi sìḿma, aↄ̃è ga wà ɛara wà tá bùsutin.
30 Tó n n Ninii gbàrɛ, pↄ́nↄ è wɛ̃̀ndi e,
nɛɛ̀ tó tↄↄtɛ ɛara à kɛ dufu.
31 Wà tó Dii gakui gↄ̃ kuu gurↄ píngi,
wà tó Dii pↄↄ kɛ nna a yãkɛnanↄa.
32 Àmbe è tↄↄtɛ gwa, ben è dege,
è ↄ kɛ kpiiinↄa, ben tɛ́sukpɛ è bↄ.
33 Mɛ́ lɛ̀ sí Diinɛ ai ma wɛ̃̀ndi lɛ́n,
mɛ́ ma Luda táaki lɛ́ ai ma gurↄ lɛ́n.
34 Ǹ tó ma laasuu kánnɛ, Dii,
lán mɛ́ɛ pↄnnaa kɛnyo nà.
35 Durunkɛrinↄ mì dɛ anduna guu,
zaakɛrinↄ tóngↄ̃ kuu dↄro.
Ma swɛ̃̀, ǹ Dii sáabu kpá.
Aleluya!