1 Èe kɛ wámbeero Dii,

èe kɛ wámbeero,

ḿbe ń dɛ wà n tↄ́ bↄ

n gbɛ̃kɛ kↄ̃n n náanɛo yãnzi.

2 À kɛ̀ dia boriinↄ è wa la

wà be wa Ludaa kú mámɛ?

3 Wa Ludaa kú musu,

pↄ́ kɛ̀ à yezin è kɛ.

4 Aↄ̃ ń tãanↄ pì kↄ̃n kondogio kↄ̃n vurao,

gbɛ̃ntee ↄzĩimɛ.

5 Aↄ̃ↄ lɛ́ vĩ, mↄde aↄ̃è yã oro,

aↄ̃ↄ wɛ́ɛ vĩ, mↄde aↄ̃è guu ero.

6 Aↄ̃ↄ swã vĩ, mↄde aↄ̃è yã maro,

aↄ̃ↄ yĩ vĩ, mↄde aↄ̃è pↄ́ gũu maro.

7 Aↄ̃ↄ ↄↄ vĩ, mↄde aↄ̃è pↄ́ kũro,

aↄ̃ↄ gbá vĩ, mↄde aↄ̃è táa oro,

aↄ̃è kòto kɛkɛro.

8 Aↄ̃ pìrinↄↄ sɛ̃nkpɛńyomɛ

kↄ̃n gbɛ̃ kɛ̀ aↄ̃ↄe ń náanɛ kɛɛnↄ ń píngi.

9 Isarailinↄ, à Dii náanɛ kɛ!

Àmbe a dↄnlɛri ũ kↄ̃n a sɛngbangoo.

10 Aruna boriinↄ, à Dii náanɛ kɛ!

Àmbe a dↄnlɛri ũ kↄ̃n a sɛngbangoo.

11 Dii vĩakɛrinↄ, à Dii náanɛ kɛ!

Àmbe a dↄnlɛri ũ kↄ̃n a sɛngbangoo.

12 Dii dↄ̀ wa yãn,

eé aubarika dawagu.

Eé aubarika da Isaraili boriinↄn,

eé aubarika da Aruna boriinↄn,

13 eé aubarika da a vĩakɛrinↄn,

nɛ́ féte gbɛ̃nsi.

14 Dii a bori kↄ̃are,

apinↄ kↄ̃n a nɛ́nↄ.

15 Dii aubarika daagu,

àmↄ kɛ̀ musu kↄ̃n tↄↄtɛo kɛ̀.

16 Musu nɛ́ Dii pↄ́mɛ,

mↄde à tↄↄtɛ nà gbɛ̃nteenↄnɛ ń ↄzĩ.

17 Èe kɛ gɛ̀nↄ bé wè Dii táaki lɛ́ro,

kesↄ̃ gbɛ̃ kɛ̀ aↄ̃ lɛ́ yĩtɛnↄ.

18 Wámbe, wégↄ̃ Dii sáabu kpaa

zaa tia ai gurↄ píngi.

Aleluya!