11
ኣማኑዋ
1 ኣማኑዋ ጊያዌ፥ ዴማና ጊዴ ናሼቻን ናጊ ኡቴዳባይ ኣማንꬂያዋኔ ቤዓናው ዳንዳዬናባ ኤሪሲያዋ። 2 ፆሳይ ቤኒ ጪማ ኣሳው ማርካታዌ፥ ኡንቱንቱ ኣማኔዳዋና።
3 ሳሉኔ ሳዓይኔ ፆሳ ቃላን ሜꬌቴዳዋ ኣማኑዋን ኑኒ ኤሬቶ፤ ሄዋ ዲራው፥ ቤቲያባይ ቤቴናባፔ ሜꬌቴዳ። ዶም 1፡1፤ ማዝ 33፡6፣ 9፤ ዮህ 1፡3
4 ኣቤል ቃዔላዋፔ ኣꬊያ ያርሹዋ ፆሳው ያርሼዳዌ ኣማኑዋና። ፆሳይ ኣ ኢሙዋባ ማርካቲዴ፥ ኢ ፂሉዋ ጊዴዳዋካ ማርካቴዳ፤ ኣቤል ሃራይ ኣቶ ሃዪቄዳሺንካ፥ ባሬ ኣማኑዋን ሃዒ ጋካናው ሃሳዬ። ዶም 4፡3-10
5 ሄኖኪ ሃይቄናን ሳሉዋ ቤዳዌ ኣማኑዋና፤ ፆሳይ ኣፌዳ ዲራው፥ ኦኒኔ ኣ ቤዓናው ዳንዳዪቤና። ፆሳ ማፃፋይ፥ «ሄኖኪ ሳሉዋ ባናፔ ካሴ ፆሳ ናሼቼዳ» ያጌ። ዶም 5፡21-24 6 ኣማኑ ባይናን ኦኒኔ ፆሳ ናሼቻናው ዳንዳዬና፤ ኣዪሲ ጎፔ፥ ፆሳኮ ዪያ ኦኒኔ ፆሳይ ዴዒያዋኔ ባሬና ኮዪያዋንቶ ዎይታ ኢሚያዋ ኣማናናው ኮሼ።
7 ኖሄ ቤዓናው ዳንዳዬና ሲንꬃፔ ሃናናባው ፆሳይ፥ «ኔና ናጋ» ጊና፥ ፆሳው ያዪዴ፥ ባሬናኔ ባሬ ሶይ ኣሳ ኣሻናው ማርካቢያ ሜꬌዳዌ ኣማኑዋና፤ ያቲዴ ሄዋን ሃ ሳዓ ቦላ ፒርዲዴ፥ ኣማኑዋን ቤቲያ ፂሎቴꬃካ ፆሳፔ ኣኬዳ። ዶም 6፡13-22
8 ኣብራሃሞ ላታናዳን፥ ፆሳይ ባሬው ኢማና ጌዳ ጋዲያ ባና ማላ፥ ፆሳይ ባሬና ፄሴዳ ዎዴ፥ ኣዛዜቴዳዌ ኣማኑዋና፤ ኢ ባሬ ጋዲያፔ ኬሲዴ ቢያ ዎዴ፥ ሃቃ ቢንቶኔ ኤሬናን ኬሴዳ። ዶም 12፡1-5 9 ኣብራሃሞ ፆሳይ ባሬው ኢማና ጌዳ ጋዲያን ሃራ ቢታ ኣሳዳን ዴዔዳዌ ኣማኑዋና፤ ፆሳይ ሄ ኢማና ጌዳዋ ባሬናና ኢቲፔ ላታና ዪሳቃናኔ ያዪቆባና ዱንካኒያን ዴዔዳ። ዶም 35፡27 10 ኣዪሲ ጎፔ፥ ኣብራሃሞ ፆሳይ ሎዖ ባሱዋን ቆፒዴ ኬፄዳ ካታማ ናጌ።
11 ሳራ ባሬ ሁጴው ሃራይ ኣቶ ኤጫዴካ፥ ኢማና ጌዳ ፆሳይ ኣማኔቴዳዋ ጊዴዳዋ ኤሬዳ ዲራው፥ ናዓ ሻሃራናው ዎልቃ ዴሜዳዌ ኣማኑዋና። ዶም 18፡11-14፤ 21፡2 12 ሄዋ ዲራው፥ ሃይቄዳ ኣሳ ማላቲያ ኢቲ ቢታኒያፔ ሳሉዋን ዴዒያ ፆሊንቲያ ኬና፥ ኣባ ጋፃን ዴዒያ ፓይዱ ባይና ሻፊያ ኬና ዛሬቱ ዬሌቴዲኖ። ዶም 18፡11-14፤ 21፡2
13 ሄ ኣሳቱ ኡባቱ ኣማኑዋን ሃይቄዲኖ፤ ባሬንቶ ፆሳይ ኢማና ጌዳዋካ ኣኪቤይኪኖ፤ ሺን ሃኩዋን ሄዋ ቤዒዴ፥ ሳሮቴዲኖ። ቃሲ ኡንቱንቱ ሳዓን ኢማꬃኔ ዬዴሪሴቲዴ ኬሴዳ ኣሳቱዋ ጊዴዳዋ ኤሬዲኖ። ዶም 23፡4፤ 1ኦድ 29፡15፤ ማዝ 39፡12 14 ኣዪሲ ጎፔ፥ ሄዋዳን ጊያ ኣሳቱ ባሬንቱ ሁጴ ጋዲያ ኮዪያዋ ኤሪሲኖ። 15 ኡንቱንቱ ሄ ዬጊዴ ኬሴዳ ጋዲያ ሲማናው ቆፔዳዋ ጊዲንቶ፥ ጉዬ ሲሚያ ካጫ ዴሜናን ኣጊኪኖ፤ ሺን 16 ኡንቱንቱ ሄዋ ኣጊዴ፥ ሎዒያ ጋዲያ ላሞቲኖ፤ ሄዌ ሳሉዋ ጋዲያ። ሄዋ ዲራው፥ ፆሳይ ኡንቱንቱ ፆሳ ጌቴታናው ዬላቴና። ኣዪሲ ጎፔ፥ ኢ ኡንቱንቶ ካታማ ጊጊሲ ዎꬄዳ።
17-18 ኣብራሃሞ ዪሳቃ ያርሻኔንቶ ዎይ ያርሼኔንቶ፥ ፆሳይ ኤራናው ፆሞሴዳ ዎዴ፥ ኣብራሃሞ ኣማኑዋን ኣ ያርሼዳ። ፆሳይ ኣብራሃማ፥ «ኔ ዛሪ ዪሳቃ ባጋና ፄሴታናዋ» ጌዳሺንካ፥ ኣብራሃሞ ባሬ ናዓ ዪሳቃ ያርሻናው ጊጌዳ። ዶም 22፡1-14 19 ኣብራሃሞ ፆሳይ ዪሳቃ ሃራይ ኣቶ፥ ሃይቁዋፔካ ፓꬃናው ዳንዳዪያዋ ኤሬዳ፤ ሄዋ ዲራው፥ ሃይቁዋፔ ጉዬ ኣ ዛሪዴ ኣኬዳ።
20 ዪሳቂ ሲንꬃፔ ሃናናባው ያዪቆባኔ ኤሳ ኣንጄዳዌ ኣማኑዋና። ዶም 27፡27-29፣ 39-40
21 ያዪቆቢ ሃይቃና ሃኒዴ፥ ዮሴፎ ናና ሁጲያን ሁጲያን ኣንጄዳዌኔ ጋቲማን ጉፌቲዴ፥ ፆሳው ጎዪኔዳዌ ኣማኑዋና። ዶም 47፡31
22 ዮሴፎ ሃይቃናው ማቲዴ፥ ኢስራዔሊያ ኣሳይ ጊብፄፔ ኬሳናዋ ሃሳዬዳዌኔ ባሬ ሜቄꬃ ኦꬃናባ ኡንቱንታ ኣዛዜዳዌ ኣማኑዋና። ዶም 50፡24-25፤ ኬስ 13፡19
23 ሙሴ ዬሌቴዳዋፔ ጉዪያን፥ ኣዉኔ ኣታ ማላ ሎዖ ናዓ ጊዴዳዋ ቤዒዴ፥ ሄዙ ኣጌና ቆሴዳዌ ኣማኑዋና፤ ኡንቱንቱ ካቲያ ኣዋጆካ ያዪቤይኪኖ። ኬስ 2፡2፤ 1፡22
24 ሙሴ ዲጬዳዋፔ ጉዪያን፥ ጊብፄ ካቲያ ናቲ ናዓ ጌቴታናዋ ኢፄዳዌ ኣማኑዋና። ኬስ 2፡10-12 25 ናጋራን ሙሴ ጉꬃ ዎዲያ ናሼታናዋፔ፥ ፆሳ ኣሳና ዋዬታናዋ ዶሬዳ። 26 ዎዴፔ ዴማና ዎይታ ኢ ቲሺ ኡዲዴ ፄሎ ዲራው፥ ጊብፄ ጋዲያ ሻሉዋ ኡባፔ ኪሪስቶሳ ዲራው ቦሬቲያዌ ዳሮ ኣꬊያ ዱሬቴꬃ ጊዴዳዋ ቆፔዳ።
27 ካቲያ ሃንቆ ሙሴ ያዬናን፥ ጊብፄ ጋዲያፔ ኬሴዳዌ ኣማኑዋና፤ ኣዪሲ ጎፔ፥ ቤቴና ፆሳ ቤዔዳዋዳን፥ ጌንጪዴ ሲንꬃው ቤዳ። 28 ሃይቁዋ ኪታንቻይ ኢስራዔሊያ ኣሳው ባይራ ናና ቦቼናዳን፥ ሙሴ ፓሲጋ ቦንቼዳዌኔ ጉባኒያን ሱꬃ ጫጫፊሴዳዌ ኣማኑዋና። ኬስ 12፡21-30
29 ኢስራዔሊያ ኣሳይ ሜላ ቢታን ሃሜቲያዋዳን፥ ዞዖ ኣባ ፒኔዳዌ ኣማኑዋና፤ ሺን ጊብፄ ኣሳቱ ፓጬው ጌሊሺን፥ ሃꬃይ ኡንቱንታ ሚቲ ኣጌዳ።
30 ኢስራዔሊያ ኣሳይ ኢያርኮ ጊያ ካታማ ሹቻ ዲርሳ ላፑ ጋላሳ ዩዪ ዩዪ ኣꬎዋፔ ጉዪያን፥ ሄ ሹቻ ዲርሳይ ኩንዴዳዌ ኣማኑዋና። ኢያ 2፡1-21፤ 6፡22-25 31 ጫራታ ራዓባ ዬዉዋ ቆሪያዋንታ ሎይꬃ ሞኬዳ ዲራው፥ ፆሳው ኣዛዜቴናን ኢፄዳ ኣሳና ሃይቄናን ኣቴዳዌ ኣማኑዋና።
32 ሲሚ ሃራባ ጉጃዴ ኣያ ኦዶ? ጌዶናባ፥ ባራቃባ፥ ሳሚሶናባ፥ ዮፍታሄባ፥ ዳዊቴባኔ ሳሜላባ፥ ቃሲ ናባቱዋባ ኦዳናው ታው ዎዲ ጊዴና። ዳት 6፡11-8፡32፤ 4፡6-5፡31፤ 13፡2-16፡31፤ 11፡1-12፡7፤ 1ሳም 16፡1-1ካ 2፡11፤ 1ሳም 1፡1-25፡1 33 ኡንቱንቱ ካቲያ ኡባና ኦሌቲዴ ፆኔዳዌኔ ፂሎባ ኦꬄዳዌ ኣማኑዋና፤ ያቲዴ ፆሳይ ኢማና ጌዳዋ ኣኬዲኖ፤ ጋሞቱዋ ዶናካ ጎርዴዲኖ። ዳን 6፡1-27 34 ዎልቃማ ታማ ቶዪሴዲኖ፤ ኩሳ ማሻፔ ኣቴዲኖ፤ ኡንቱንቱ ዳቡራንቻ፤ ሺን ሚኔዲኖ፤ ቃሲ ኦላን ሚኒዴ፥ ሃራ ጋዲያ ኦላ ኣሳ ዬዴርሴዲኖ። ዳን 3፡1-30 35 ማጫዋንቱ ባሬንቱ ሃይቄዳዋንታ ሃይቁዋፔ ዴንዲና ኣኬዲኖ።
ቃሲ ሃራንቱ ቃሹዋፔ ቢሌታናዋ ኢፂዴ፥ ኬኪያ ዴዖ ሃይቁዋፔ ዴንዳናው፥ ኡጋቲዴ ሃይቄዲኖ። 1ካት 17፡17-24፤ 2ካት 4፡25-37 36 ሃራቱዋ ቦላ ኣሳይ ቂሊጪ ካዔዳ፤ ሊሱዋን ሾጬቴዲኖኔ ሳንꬃላታን ቃሼቲዴ፥ ቃሾ ጎሊያ ጌሌዲኖ። 1ካት 22፡26-27፤ 2ኦድ 18፡25-26፤ ኤርም 20፡2፤ 37፡15፤ 38፡6 37 ሹቻን ጫዴቴዲኖ፤ ማጋዚያን ላዑ ኬሲዴ ጳልቄቴዲኖ፤ ፓጬቴዲኖ፤ ማሻን ሃይቄዲኖ፤ ኡንቱንቶ ኡባባይካ ꬋዪና፥ ዋዬቲዴ ቱጋቲዴ፥ ዶርሳ ጫላኔ ዴሻ ጫላ ማዪዴ ዩዬዲኖ። 2ኦድ 24፡21 38 ኡንቱንቱሲ ሃ ኣላሚ ጊጌናን ኢፂና፥ ዎራን፥ ዴሪያን፥ ጎንጎሉዋ ጊዶኒኔ ኦላ ጊዱዋን ዩዬዲኖ።
39 ፆሳይ ኡንቱንቱ ኣማኑዋ ማርካቶፔካ፥ ሄዋንቱ ኡባቱ ኢ፥ ኢማና ጌዳዋ ኣኪቤይኪኖ። 40 ፆሳይ ኑሲ ኢቲ ሎዖ ቆፋ ቆፒ ዎꬄዳ ዲራው፥ ኡንቱንቱ ኑኒ ባይናን ባላይ ባይናዋንታ ጊዲኪኖ።
11:3 ዶም 1፡1፤ ማዝ 33፡6፣ 9፤ ዮህ 1፡3
11:4 ዶም 4፡3-10
11:5 ዶም 5፡21-24
11:7 ዶም 6፡13-22
11:8 ዶም 12፡1-5
11:9 ዶም 35፡27
11:11 ዶም 18፡11-14፤ 21፡2
11:12 ዶም 18፡11-14፤ 21፡2
11:13 ዶም 23፡4፤ 1ኦድ 29፡15፤ ማዝ 39፡12
11:17-18 ዶም 22፡1-14
11:20 ዶም 27፡27-29፣ 39-40
11:21 ዶም 47፡31
11:22 ዶም 50፡24-25፤ ኬስ 13፡19
11:23 ኬስ 2፡2፤ 1፡22
11:24 ኬስ 2፡10-12
11:28 ኬስ 12፡21-30
11:30 ኢያ 2፡1-21፤ 6፡22-25
11:32 ዳት 6፡11-8፡32፤ 4፡6-5፡31፤ 13፡2-16፡31፤ 11፡1-12፡7፤ 1ሳም 16፡1-1ካ 2፡11፤ 1ሳም 1፡1-25፡1
11:33 ዳን 6፡1-27
11:34 ዳን 3፡1-30
11:35 1ካት 17፡17-24፤ 2ካት 4፡25-37
11:36 1ካት 22፡26-27፤ 2ኦድ 18፡25-26፤ ኤርም 20፡2፤ 37፡15፤ 38፡6
11:37 2ኦድ 24፡21