1 Managə wala gaba bwa gwayni gənə̂ nare nə̂ Juwib day di ba ꞌyen̰ bam mwom da, Mari də Magədala me, Mari də Jak iw me, Salome me, kəlgə swani gə gə ɓaməw gə mani jiga jiga gə bii ꞌyol nan̰ dara hara ɗadə kumbə dənə̂ Jesu. 2 Gə dəmas gə jomni cor̰ə̂r̰ə̂ dawa ganda dəra gə daa-lə̂ da, cendi ha əjə managə munə-lə̂ di. 3 Cendi wajə gwale bulə̂ day-ə̂ ba da: «I wi me ha nwangər̰andə kur̰a də gə əbdə managə munə bəwə̂ di bam mo?» 4 Ər̰ə, cendi u dərə̂gə daa mwom da, kur̰a də munə bəwə̂ di nwangər̰ər bam ɗəm! Ɓag da, kur̰a də ta di jor nan̰e. 5 Cendi gandə ha managə munə di dalawə̂ me yə̂r dwe gə mache dam managə munə-lə̂ əsay gə abe-yə̂, hurə̂ barge gə geche gə burage kə̂ng yande. Mwom da, lan̰a algə. 6 Me dwe gə mache di waygə ba da: «Alna lan̰a bə̂də̂! Nə̂ ꞌocn̰ dara anə̂ kan̰jə i Jesu gə Najared, an̰ji gə gə ɓengəw ɓabər̰əw daa habda gə dagəla səwə̂ di. Me an̰ji dəm daa nare nə̂ mare dwar̰agələ̂ ɗəm, an̰ji ilə̂ ka bə̂də̂. Yarna mana gə gə asəw lə̂ ka di. 7 Caga da, hana waynaw Piyer me woni gərsə̂ gwale gənə̂ Jesu duwa nə̂ ɗang di me Jesu ba ha gamagə lə̂ alə̂ wama gə Galile-yə̂. Cendi ba hara yaraw alə̂ ta, ya an̰ji ba wayagə nəm pii de.»

8 Mwom da, namde di dəmdə iche managə munə-lə̂ di, wagə gə gidi. Sədə̂gə sadəgə daa tag tag me, dədə̂gə nol bam me, cendi tin̰ bədə̂gə wayəw gun mən daa bə̂də̂, dara lan̰a algə nan̰e.

9 [Managə Jesu dəmə̂ nəm daa munə-lə̂ gə wala gə dəmas gə jomni da, an̰ji gəldə i Mari də Magədala səw do. I tandi me an̰ji tanga ꞌyordə dundi də acn̰e wurgəsubu bam sədə̂ di. 10 Tandi ha gəra ha ꞌywa cendi nə̂ tanga basə Jesu harbə gandəw di dara wayagə ba də yara Jesu ba i bəra. Managə tandi ha gəra ꞌywagə mwom da, cendi dam ilə̂ nulə̂-lə̂ me ala n̰agəni-yə̂ me ca. 11 Mwom da, tandi waygə ba Jesu di ba ilə̂ bəra me ba də yaraw me ca kaw, cendi yə gwale dəra di bə̂də̂.

12 Targin̰ ɗang da, managə woni gərsə̂ gwale gənə̂ Jesu duwa nə̂ sər ilə̂ hara-lə̂ dara hara bam da, Jesu di gəlgə səw wun jiga hin̰e. 13 Cendi cwara ꞌyo kwandagə bi me waygə nõ də ta di kaw, kwandagə di yə gwale day di bə̂də̂.

14 Targin̰ ɗang da, Jesu gəlgə woni gərsə̂ gwale duwa nə̂ mwaj dii mən di səw, managə cendi ilə̂ wama mani-yə̂. An̰ji sogədəgə dara dii day də woye də cendi gən̰ nəm gə yə̂ə̂ gə gwale gənə̂ woni yaraw ba i bəra bam di. 15 Ər̰ə an̰ji waygə da: «Hana managə sən̰a gəndədələ̂ pad, waynagə nare pad Nõ də lade di. 16 Gun gə dara kala dusəw lə̂ diyə̂ me alna batem me da, an̰ji ha ꞌywa bələ̂. Gun gə kalna dusəw lə̂ diyə̂ bə̂də̂ da, Mãr̰ĩ ha bwaw gwale dəwə̂ dara ba hana nəm duwa də idə budə̂ bam bə̂də̂ bər̰in̰ lə̂ di. 17 Me cendi nə̂ ha kala dusərə̂gə lə̂ diyə̂ da, yarna mani nə̂ dan̰a nə̂ al lan̰a nə̂ ha gələ̂gə nare ha ꞌwacn̰agə nəm: I gə sumən me cendi ha ꞌywara gə dundi də acn̰e bam nare sədə̂gələ̂, me ha waya bii gə ɗang gə dii mən cendi ꞌocn̰əw bə̂də̂ me. 18 Cendi ha neyama yibə̂ kwalale gə əsəragə, me chana charwa də idə ꞌyaa mana kaw ha alagə mani mən bə̂də̂ bər̰in̰. Cendi ha bwa əsəragə nare woni mwom sədə̂gələ̂, me woni mwom di ha ꞌywa labiya.»

19 Targin̰ ɗang, managə Aba ciri gə Jesu waygə yande mwom da, Mãr̰ĩ uw yaa nəm daa dama əsə̂w gə abe-yə̂. 20  Woni gərsə̂ gwale gənə̂ Jesu duwa day da, ha waya Nõ də lade di ciri-yə̂ jiga jiga. Aba ciri gə Jesu di wagə lə̂ me ꞌyagə dwana də idə alagə mani nə̂ dan̰a me ca. I ya ta de me an̰ji gəl nəm dara gwale day di ba i gwale səw.]