5
भाःत मदुपिं मिसात, थकालित व दासतय्गु बारे सल्लाह
1 थः स्वयाः थकालिपिन्त ब्वः बी मते। इमित छुं धाये माःसा थः बौयात थें धा। थः स्वयाः क्वकालिपिन्त किजापिन्त थें व्यवहार या। 2 अथे हे थकालिपिं मिसातय्त मांपिन्त थें अले क्वकालिपिं मिसातय्त मनय् पाप मतसे केहेँपिन्त थें व्यवहार या।
3 हाःनाः मदुपिं भाःत मदुपिं मिसातय्त हनाबना तयेगु या। 4 काय्म्ह्याय्पिं व छय्पिं दुम्ह भाःत मदुम्ह मिसायागु सुसाःकुसाः वया काय्म्ह्याय्पिं व छय्पिन्त हे याके ब्यु। इमिसं थःगु छेँय् निं धर्म याये सय्के ब्यु, अले मांबौयागु त्यासा पुले ब्यु, छाय्धाःसा परमेश्वर थज्याःगु ज्यां लय्तायादी।
5 हाःनाः मदुम्ह भाःत मदुम्ह मिसां परमेश्वरयाके भरोसा तयाच्वनी। अले चांन्हिं परमेश्वरयात प्रार्थना यानाच्वनी। 6 भाःत मदुम्ह मिसां यःयःथें सनाः मोजमज्जा याना जुल धाःसा व सीगु ति हे ग्यनी। 7 अज्याःपिं मिसातय्त दोष मदय्क जुइ फये मा धकाः थ्व खँ स्यनेकने या।
8 सुनां थःथितियागु, अज्ज ला थः हे जहानपिनिगु तकं सुसाःकुसाः याइ मखु, वयागु विश्वास सितिं वंगु ति ग्यनी। अज्याःपिं मनूत विश्वास मयाःपिं स्वयाः नं मभिंपिं जुइ।
9 छम्ह जक मिजं नाप ब्याहा याःम्ह, खुइदँ दये धुंकूम्ह भाःत मदुम्ह मिसायात 10 बांलाःगु ज्या यानाः नां जाःम्ह, मस्तय्त ब्वलंकूम्ह, पाहांतय्त दुनुगलंनिसें दुकाइम्ह, परमेश्वरया मनूतय्त तुति सिलाः सेवा याइम्ह, हाःनाः मदुपिन्त ग्वाहालि याइम्ह व भिंगु ज्याय् जक मन तयाः जुइम्ह जूसा वयात भाःत मदुपिं मिसातय्गु नांया धलखय् दुथ्याकूसां ज्यू।
11 भाःत मदुपिं ल्यासेपिं मिसातय्गु नां धाःसा धलखय् दुथ्याके मते, छाय्धाःसा इमिसं ख्रीष्टयागु ज्या त्वःताः हानं ब्याहा यायेत स्वइ। 12 थथे इमिसं न्हापा चिनातःगु बाचा ल्वःमंकूगुलिं इपिं दोषी ठहरय् जुइ। 13 अज्ज ला इपिं छेँय् छेँय् चाःहिलाः ज्या मयासे जुइ। थुलि जक मखु, इपिं खँगुलु जुइ, अले इमिसं मेपिनिगु ज्याय् ल्हाः तया जुइगु व ल्हाय् मज्यूगु खँ नापं ल्हाना जुइ। 14 अय्जूगुलिं भाःत मदुपिं ल्यासेपिं मिसातय्सं ब्याहा यायेगु हे भिं जू। थुपिं मचाखाचा दय्काः छेँ बांलाक कःघाना च्वनिपिं जुइ माः। अथे जूसा झी शत्रुतय्सं नं धायेथाय् दइमखु। 15 गुम्हं गुम्हं भाःत मदुपिं मिसात ला अथे बांमलाक सना जुयाः शैतानयागु ल्हातय् लाः वने नं धुंकल।
16 सुं विश्वासी मिसायाथाय् थथे भाःत मदुपिं मिसात दुसा वं हे इमित स्वये माः। थथे याःसा मण्डलीयात थाकुइ मखु। अले जक मण्डलीं भाःत मदुपिं हाःनाः मदुपिं मिसातय्त बांलाक ग्वाहालि याये फइ।
थकालिपिन्सं याये माःगु ज्या
17 बांलाक ज्या याःपिं थकालिपिन्त अप्वः हनाबना तये माः। अज्ज ला वचन न्यंकीपिं व स्यनिपिन्त अप्वः हनाबना तये माः। 18 धर्मशास्त्रय् नं थथे धयातःगु दु -- “दाइं यायेबलय् द्वहंयागु म्हुतुइ पिचा तयाबी मते।” अले “ज्या याःम्हय्सित ज्याला बी हे माः।”* ५:१८ व्य २५:४; मत्ती १०:१०; लूक १०:७
19 निम्ह स्वम्ह साक्षी मदय्कं सुनानं थकालियात द्वपं बिल धाःसां पत्याः याये मते।* ५:१९ व्य १७:६; १९:१५ 20 पाप याइपिन्त फुक्कसिया न्ह्यःने हे ब्वः ब्यु। थथे याःसा जक मेपिं नं ग्याइ।
21 परमेश्वर, ख्रीष्ट येशू व ल्यया तःपिं स्वर्गदूततय्गु न्ह्यःने जिं छन्त थ्व खँ धयाच्वना। थथे ज्या यायेबलय् सुयागुं पँ ली मते, अले सुयागुं ख्वाः स्वये मते।
22 हथाय् चायाः सुयातं छेनय् ल्हाः तयाः मण्डलीयागु ज्याय् तये मते, छाय्धाःसा व मनू मभिंम्ह जूसा वयागु पाप छन्त नं लाइ। थःत पापपाखें तापाक हे ति।
23 न्हापा थें लः जक त्वने मते। थःगु प्वाःयागु निंतिं उसाँय् मदुगुया निंतिं भचा भचा दाखमद्य नं त्वनेगु या।
24 गुम्हय् गुम्हय्सिगु पाप ला बांलाक हे सी दयाच्वनी, इपिं न्हापा हे दोषी ठहरय् जुइ। गुलिसिगुं पाप ला लिपा लिपा जक सी दइ। 25 अथे हे गुलि गुलिं भिंगु ज्या ला न्हापा हे बांलाक सी दइ। अले सी मदुगु नं लिपा सी दया वइ, त्वपुया तये फइ मखु।