1 Ne zutun, is menge pengulu te menge kevuwazan ni Levi midhendiyà te ki Eleazar he memumuhat, ki Josue he anak ni Nun, wey ziyà te menge pengulu te kada tribu te Israel 2 diyà te Shilo he tanà te Canaan. Migkaǥi sikandan diyà te kandan te, “Midsuǥù is Nengazen pinaaǥi ki Moises he ebeǥayan key te menge inged he egkeubpaan dey wey menge penebtavà he para te uyaǥen dey.” 3 Umbe, sumalà dutun te insuǥù te Nengazen mibeǥayan is menge kevuwazan ni Levi te menge inged wey menge tanà he menge pepenebtavè dan he midtarin diyà te menge vahin te tanà te menge Israilihanen.

4 Is nehuna he mibeǥayan te menge inged iyan is menge kevuwazan ni Kohat. Kevahin te kevuwazan ni Kohat is menge kevuwazan ni Aaron, ne mibeǥayan sikandan te 13 he menge inged he nesakup diyà te tanà te tribu eni Juda, Simeon, wey Benjamin. 5 Is duma he menge kevuwazan ni Kohat mibeǥayan te 10 he menge inged he nesakup diyà te tanà te menge tribu eni Efraim, Dan, wey ketengà he tribu ni Manase.

6 Is menge kevuwazan ni Gershon mibeǥayan te 13 he menge inged he nesakup te menge tanà te tribu eni Isachar, Asher, Naftali, wey te ketenga he tribu ni Manase diyà te Bashan.

7 Is menge kevuwazan ni Merari mibeǥayan te 12 he menge inged he nesakup te menge tanà te menge tribu eni Reuben, Gad, wey Zebulun.

8 Pinaaǥi te kedripa, mibeǥayan te menge Israilihanen is menge kevuwazan ni Levi te menge inged wey menge penebtavà, su iyan heeyan insuǥù te Nengazen ki Moises.

9-10 Iyan heini menge inged he nesakup te tanà te tribu ni Juda wey ni Simeon he imbeǥey ziyà te menge kevuwazan ni Aaron. Heini sikandan menge kevuwazan ni Kohat te anak ni Levi. Iyan sikandan nehuna he neripahan he ebeǥayan te menge inged. 11 Imbeǥey kandan is Kiriat Arba (he iyan is Hebron) ziyà te menge vuvungan te Juda, ragkes en is menge penebtavà diyà te peliǥuy kayi. (Si Arba iyan amey ni Anak.) 12 Piru is menge vevesukà wey zezeisey he menge inged diyà te peliǥuy kayi he inged imbeǥey en mulà diyà te ki Caleb te anak ni Jefune he iyan kandin he vahin. 13 Umbe, imbeǥey ziyà te menge kevuwazan ni Aaron he memumuhat is Hebron (he sevaha zuen te menge inged he eputà he ebpekaaput dutun is etew he nekepatey he wazè din tivevaa). Elin imbeǥey kandan is Libna, 14 Jatir, Eshtemoa, 15 Holon, Debir, 16 Ain, Juta, wey Bet Shemesh, ragkes is menge penebtavà kayi. Ne 9 he menge inged is nesakup te tanà te tribu ni Simeon wey ni Juda. 17 Imbeǥey pa kandan is heepat he menge inged he nesakup te tanà te tribu ni Benjamin. Heini iyan is Gibeon, Geba, 18 Anatot, wey Almon, ragkes is menge penebtavà kayi.

19 Ne 13 he menge inged langun ragkes is menge penebtavà kayi is nezawat te menge memumuhat he menge kevuwazan ni Aaron.

20-22 Is duma he menge kevuwazan ni Kohat he ebpuun diyà te tribu ni Levi nekezawat te heepat he menge inged he nesakup te tanà te tribu ni Efraim. Heini iyan is Shekem (he ziyà te vuvungan te Efraim he sevaha zuen te menge inged he eputà he ebpekaaput dutun is etew he nekepatey he wazè din tivevaa), is Gezer, Kibzaim, wey Bet Horon, ragkes is menge penebtavà kayi.

23-24 Mibeǥayan daan sikandan te heepat he menge inged he nesakup te tanà te tribu ni Dan. Iyan is: Elteke, Gibeton, Ayalon, wey Gat Rimon, ragkes is menge penebtavà kayi.

25 Ne puun daan te tanà te ketengà he tribu ni Manase he ziyà te edsenlepan nekuwa zan daan is dezuwa he inged he iyan is: Taanak wey Gat Rimon, ragkes is menge penebtavà kayi. 26 Ne 10 langun he menge inged ragkes is menge penebtavà kayi, is imbeǥey ziyà te nesamà he menge kevuwazan ni Kohat.

27 Is menge kevuwazan ni Gershon he ebpuun daan diyà te tribu ni Levi, nekezawat te zezuwa he inged he nesakup te tanà te ketengà he tribu ni Manase he ziyà dapit te edsilaan he iyan is: Golan diyà te Bashan (he sevaha zuen te menge inged he eputà he ebpekaaput dutun is etew he nekepatey he wazè din tivevaa), wey is Beeshtera, ragkes is menge penebtavà kayi. 28-29 Mibeǥayan daan sikandan te heepat he menge inged he nesakup te tanà te tribu ni Isachar he iyan is: Kishion, Daberat, Jarmut, En Ganim, ragkes is menge penebtavà kayi. 30-31 Ne zuen te tanà he nesakup te tribu ni Asher, imbeǥey ziyà te kandan is heepat he inged he iyan is: Mishal, Abdon, Helkat, wey Rehob, ragkes is menge penebtavà kayi. 32-33 Ne mibeǥayan pa sikandan te tetelu he inged he nesakup te tanà te tribu ni Naftali he iyan is: Kedesh diyà te Galilea (he sevaha zaan duen te menge inged he eputà, he zutun egkehimu he ed-aput is sevaha he etew he nekepatey he wazè din tivevaa), is Hamot Dor wey is Kartan, ragkes is menge penebtavà kayi. Ne 13 he menge inged ragkes is menge penebtavà kayi is imbeǥey ziyà te kevuwazan ni Gershon.

34-35 Is nesamà he menge kevuwazan ni Levi he menge kevuwazan ni Merari mibeǥayan te heepat he menge inged he nesakup te tanà te tribu ni Zebulun. He iyan is Jokneam, Karta, Dimna, wey Nahalal, ragkes is menge penebtavà kayi. 36-37 Mibeǥayan daan sikandan te heepat he menge inged he nesakup te tanà te tribu ni Reuben. He iyan is Bezer, Jahaz, Kedemot, wey Mefaat ragkes is menge penebtavà kayi. 38-39 Ne ziyè daan te tanà he nesakup te tanà te tribu ni Gad mibeǥayan sikandan te heepat he inged, he iyan is: Ramot he ziyà te Gilead (he sevaha zuen te menge inged he eputà he ebpekaaput dutun is etew he nekepatey he wazè din tivevaa), is Mahanaim, Heshbon, wey Jazer, ragkes is menge penebtavà kayi.

40 Ne 12 he menge inged ragkes is menge penebtavà kayi is nekuwa te menge kevuwazan ni Merari he nesakup te tanà te tribu ni Levi.

41-42 Ne 48 he menge inged ragkes is menge pepenebtavà kayi is imbeǥey ziyà te menge kevuwazan ni Levi he nesakup te tanà te menge Israilihanen.

43 Iyan heini paaǥi te kebeǥaya te Nengazen diyà te Israel duen te tanà he impenaad din diyà te menge kepuun dan. Ne hein nekuwa zan en heini ne zutun en sikandan med-ubpà. 44 Ne impemelinew te Nengazen is ked-ubpè dan su wazè dan en mekepekidtebek te menge kuntada zan diyà te peliǥuy, su iyan heini insaad te Nengazen diyà te menge kepuun dan. Wazà sikandan mezaag te menge kuntada zan su impezaag kandan te Nengazen is langun he menge kuntada zan. 45 Midtuman te Nengazen is langun he insaad din diyà te menge etew te Israel.