4
Kippol haala dow aawoowo
1 Iisa soƴƴii nyannde gom dow peta Galili no waajoo. Jama'aare mawne gom wari, fiilii mo. Ɗuuɗol himɓe ngool waɗi o naati laana ndiyam, o jooɗii. Jama'aare ndeen duu no darii hunnduko peta ngaan. 2 Omo waajoroo ɓe kippi haalaaji keewɗi, omo wi'a ɓe :
3 —Kettinee ! Aawoowo gom dilli nyannde gom faa aawowa aawdiiri mum. 4 Nder aawre ndeen, gabbe gom caami sera laawol. Nden pooli ngari coppi ɗe. 5 Gere majje caami nder korkaaƴe to leydi ɗuuɗaa. Ɗe puɗilawi ngam luggiɗaa sanne. 6 Amma wakkati naange wulnoo ndeen, ɗe ɗayli, ɗe njoori ngam ɗe ngaɗaay ɗaɗi. 7 Gere majje caami to kebbe puɗata. Kebbe ɗeen mawni, ɓillii ɗe, ɗe ndimaay. 8 Gere majje duu caami nder leydi lobbiri, puɗi, mawni, ndimi. Wassaaŋo gom rimi camme woronja, wonngo lasooji tati, wonngo duu hemre. 9 Jom nowru nanooru fuu, nana !
10 Wakkati Iisa wonnoo feere mum, *aahiiɓe makko sappo e ɗiɗo ɓeen he woɓɓe nder piiliiɓe mo ƴami mo maana kippol haala ngool. 11 O jaabii ɓe o wi'i :
—Onon, Alla hokkii on baawɗe anndude ko suuɗi dow habaru Laamu mum. Amma ɓe tawaaka hakkune mooɗon kippi haala kaalantee huune fuu. 12 Ngam majjum waɗi :
Baa nde ɓe ndaari, ɓe ngi'ataa,
baa nde ɓe nani, ɓe paamataa,
ngam nde nii ɓe paamii, ɓe tuuban, ɓe njaafee.* 4.12 Esaaya 6.9-10
13 Ndenne, nde nii on paamaay kippol haala ngool, noy paamirton ɗiito ? 14 Aawoowo oon, haala Alla aawata. 15 Sera laawol to aawdiiri ndiin saami woni nanuɓe haala Alla, amma wakkati mum da Ibiliisa wari, itti ka nder ɓerɗe maɓɓe. 16 Korkaaƴe to aawdiiri ndiin saami woni nanuɓe haala Alla, njaɓɓorii ka welwelo wakkati mum da. 17 Amma ngam ka waɗaay ɗaɗi nder maɓɓe, ɓe nanngan ka wakkati seɗɗa tan. Nde nii ɓe ɓillake naa nde ɓe torraama ngam makka, ɓe mboppan ka wakkati mum da. 18 To kebbe puɗidi aawdiiri ndiin woni nanuɓe haala Alla, 19 amma sakkulla duuniyaaru, suuno njawdi, he muuyɗe ɓerne naatanta ɓe, kuma haala Alla, ka laatoo ndimara. 20 Leydi lobbiri to aawdiiri ndiin saami woni nanuɓe haala Alla dey njaɓi ka, naforii ka faa ɓe ngaɗi barke : Woɓɓe kile woronja, woɓɓe kile lasooji tati, woɓɓe duu kile hemre.
Fitilla kuɓɓaaka
21 Iisa ɓeydi wi'ude ɓe kaden :
—No woodi kuɓɓoowo fitilla dey hippa tummbude dow makka naa sorna ka ley leeso ? Hanaa on ɓilan ka naa ? 22 Huune fuu ko suuɗi no wanngowan nyannde gom. Ko soomaa fuu duu no somtetee. 23 Jom nowru nanooru fuu, nana !
24 Korkitee noppi mooɗon faa wooɗa ! Etirgal ngal etirton, kanngal etiranteɗon faa duu ɓeydaneɗon. 25 Jogiiɗo fuu no ɓeydantee. Amma mo walaa oon, baa seɗɗa mo jogii oon, no teetetee.
Nanndinol Laamu Alla
26 —No Laamu Alla tinndinirtee nii : Ngu nanndaana he neɗɗo biccuɗo aawdiiri mum nder ngesa. 27 Balɗe no njaha, balɗe no ngarta aawdiiri ndiin fuɗi, mawni. Amma neɗɗo oo anndaa baa seɗɗa no waɗi ko ndi mawni. 28 Leydi ndiin funni aawdiiri ndiin, ndi fiyi ƴommbe, wutaanu tokki, gaɗa mum, gabbe tokki. 29 Wakkati ngesa ngaan ɓenndowi, sey neɗɗo oo adi kettirngal mum, hetti nga, ngam nga foti hetteede.
30 He ɗume mbaawten nanndinde Laamu Alla kaden ? Tinndinoore ndeye tinnidirten ngu ? 31 Laamu Alla no nanndi he wabbere mutaari, ɓurde gabbe fuu famɗude. 32 Amma nde nii nde aawaama, nde fuɗan, nde mawna faa nde laatoo lekki mawki. Lekki kiin waɗa licce mawɗe, ɗe cukka faa pooli no mbaawi nyiɓi cuuɗi mum'en ley majje.
33 Iisa naforake iri kippi haala keewɗi, omo gollira ɗi, dey-dey no jama'aare ndeen waawirta faamude. 34 Walaa fuu ko o haalani ɓe ko hanaa nder kippol haala o haalii ɗum, amma wakkati o tawa kanko tan sey *aahiiɓe ɓeen, omo fiirtana ɓe maana majji.
Iisa darnii henndu
35 Laasara, Iisa wi'i *aahiiɓe mum :
—En pedditin peta ngaa, koɗowen fonngo gooto.
36 Ɓe ummii ɓe acci jama'aare ndeen, ɓe naati nder laana ka Iisa wonnoo nder mum kaan, iɓe peddita, laanaaji gom no tokki ɓe. 37 Henndu sattunu gom ummini benkeƴƴe no piya laana kaan faa ka hosi rufude. 38 Iisa no gaɗa, no wahii wawlaare, no ɗaanii. Sey *aahiiɓe ɓeen pindini mo, mbi'i mo :
—Moodibbo, a faalaaka maayen naa ?
39 Nden Iisa ummii, sappii henndu nduun, wi'i benkeƴƴe ɗeen :
—Fatti ! Ndaree !
Henndu nduun darii, joonkay ɗum waɗi siw nokku fuu. 40 Iisa wi'i *aahiiɓe ɓeen :
—Ko waɗi kulirɗon nii ? Noy waɗi on ngoonɗinaay naa ?
41 Kulkulal manngal nanngi ɓe, ɓe tokki iɓe mbi'odira :
—Moy woni neɗɗo oo, mo baa henndu e ndiyam no ɗowtanoo ɗum ?