7
Geddi dow finaa-tawaa hakkune Iisa he ardiiɓe gom
1 Nyannde gom *Fariisa'en he jannginooɓe *Tawreeta gom ƴuwi *Ursaliima ngari to Iisa. 2-4 Nder finaa-tawaa *Fariisa'en e *Yahudankooɓe, neɗɗo nyaamataa, lootaay juuɗe mum faa laaɓa. Kaden duu se neɗɗo warti, ƴuwi luumo, nyaamataa se lootaaki. Iɓe ngoodi duu finaa-tawaaji gom ɗi ɓe tokki hano lawƴol kore, ƴogirɗe, nyamruɗe, looɗe, e payanɗe. *Fariisa'en he jannginooɓe *Tawreeta ɓee ngi'ii ko nder *aahiiɓe Iisa woɓɓe lootaay juuɗe mum'en, iɓe nyaamira juuɗe ɗe laaɓaa.* 7.2 Lootol juuɗe ngool hanaa ngam ittude tuuni, amma ngam joomum dartinoo nder ko diina mum wi'i. 5 Nden ɓe ƴami Iisa, ɓe mbi'i :
—Ɗume waɗi *aahiiɓe maaɗa tokkataa finaa-tawaaji maamiraaɓe meeɗen, iɓe nyaamira juuɗe tunnuɗe ?
6 Nden Iisa jaabii ɓe, wi'i :
—Munafiki'en ! *Esaaya woofaay sam, wakkati o waɗunoo annabaaku dow mooɗon. Nder maggu Alla wi'i :
Himɓe ɓee no mbi'an kam'en no teddina kam,
amma ɓerɗe maɓɓe no mboɗɗi kam.
7 Dewal maɓɓe no meere
ngam ko ɓe ngoni iɓe njanngina ɗum
to ɓiɓɓe aadama ƴuwi.† 7.7 Esaaya 29.13
8 Onon *Fariisa'en, oɗon acca tilsinooje Alla, oɗon tokka finaa-tawaa ɓii-aadama. 9 Oɗon coofi finaa-tawaaji mooɗon he tilsinoore Alla ! 10 Ngam nder *Tawreeta, *Muusa wi'i : Teddin inna maa he bammaa.‡ 7.10 Burtaaki 20.12 ; Wi'itaade Tawreeta 5.16 O wi'i kaden duu : Kuɗuɗo innum naa bammum fuu no haani wareede.§ 7.10 Burtaaki 21.17 ; Lewinkooɓe 20.9 11 Amma onon, ɗume mbi'oton, se neɗɗo wi'i innum naa bammum : Ko mbaawmi wallirde ma ɗum no « Korban », ko mi sakkanta Alla. 12 On mbi'an mo, o accaa waɗande inniiko naa baabiiko fuy naa ? 13 Nii ngaɗirton, oɗon ngartira haala Alla meere ngam finaa-tawaaji mooɗon ɗi njannginton sukaaɓe. Ir majjum re'ataa ngonɗon oɗon ngaɗa.
14 Iisa nodditi jama'aare ndeen wi'i nde :
—On fuu, kettinanee kam, paamee ko 15 huune fuu ko ƴuwi yaasin naati nder ɓanndu neɗɗo hanaa kam watta joomum tunna yeeso Alla. Amma ko wurtotoo nder neɗɗo kam tunninta neɗɗo yeeso Alla. [ 16 Jom nowru nanooru fuu nana !]* 7.16 Aaya 16 tawaaka nder ɗereeji arani fuu.
17 Iisa seedi he jama'aare ndeen, warti wuro. *Aahiiɓe makko ngari, ƴami mo maana ko o wi'i ɗum. 18 Nden o jaabii ɓe o wi'i :
—Onon duu, on paamaay naa ? On paamaay ko huune fuu ko ƴuwi yaasin, naati ɓanndu neɗɗo, tunnintaa ɗum. 19 Ɗum naataay nder ɓerne joomum, nder reedu joomum tan ɗum naati, nden ɗum yehee gaɗa wuro.
Nder haalaaji ɗii, Iisa no holla ko nyaamdu fuu no laaɓi. 20 O wi'i *aahiiɓe ɓeen kaden :
—Ko wurtotoo ɓerne ɓii-aadama, kam tunninta ɗum. 21 Ngam nder ɓerne neɗɗo miilooji bonɗi mburtoto hano iri ko semtini, nguyka, ittol yonki, 22 jeenu, eelgal bonngal, bononda, jammba, golle nyidduɗe, haasidaaku, haala mbonka, mawnitaare, he bahimaare. 23 Golle bonɗe fuu nder ɓerne ƴuwata, kanƴe duu tunninta neɗɗo.
Goonɗinol debbo gom mo hanaa Yahudanke
24 Iisa ummii, wari weeri leydi Tirus. O jippii nder ɓaade gom, o hiɗaa neɗɗo fuu faama to o woni. Amma ɗum fuu haɗaay himɓe anndi to o woni. 25-26 Nder wakkati mum, debbo ɓii-leydi Finisi-Siriya gom, ɓiyum debbo, ginnaaru no dow mum. Debbo oo hanaa Yahudanke, o nani habaru Iisa no waɗee. O ummii, o wari, o hofi yeeso Iisa. O eeli Iisa riiwa ginnaaru wonndu gaɗa ɓiyiiko. 27 Nden Iisa wi'i mo :
—Accu sukaaɓe nyaama faa kaara ginan. Ngam hegaaki neɗɗo hooƴa nyaamdu sukaaɓe faɗɗana dawaaɗi.
28 Debbo oon jaabii Iisa, wi'i :
—Goonga non, Joomam. Amma dawaaɗi duu no nyaama ko sukaaɓe camninta yeeso mum'en.
29 Sey Iisa wi'i debbo oon :
—Ngam njaabaaki maaɗa kii, hootu, ɓiya seedi he ginnaaru nduun.
30 Debbo oon hooti, tawi ɓiyum seedi he ginnaaru nduun, no fukkii dow leeso.
Nyawtol gorko paho gom
31 Iisa ummii leydi Tirus, fa'i leydi Sidon, nden warti har peta Galili, o naati leydi Gure-sappo. 32 Nder leydi Gure-sappo, o waddanaa gorko paho gom, mo haala mum laaɓaa. O eelaa, o yowa junngo makko dow gorko oon. 33 Iisa hakkiti paho oon he jama'aare ndeen, watti kolli mum nder noppi paho oon, tutti nder junngo mum, meemi ɗemngal makko. 34 O tiggitii, o uumi, nden o wi'i paho oon nder aramankoore :
—Efata !
Kam woni : « Cukkitee ! »
35 Wakkati mum da, noppi gorko oon cukkiti, ɗemngal makko yoofaa, haala makko darti. 36 Nden Iisa wi'i to neɗɗo fuu haalan ɗum goɗɗo. Amma ngam omo haɗa ɓe, waɗi kamɓe duu iɓe ɓeyda sankitidde haala kaan. 37 Haayne nanngi ɓe faa noy walaa, ɓe tinni iɓe mbi'a :
—Golle Iisa fuu no mbooɗi, faa yottii to Iisa no waɗa pahuɓe nana, beebeeɓe duu njeccoo.