16
Ymaro Ritonõpo exikehpyra mana
Sero saumu tymerose Tawi a.
1 Kuewomako, Ritonõpo, oenetuputyryke ya,
towomase ywy oya!
2 Ritonõpo a ynara ase:
“Omoro mase Jesemy; ymõkomory kurã
emero onekarohpyryme mana.”
3 Kure rokẽ mã mokaro,
Ritonõpo omipona exiketomo!
Atãkyemãko ase toto maro jahtao.
4 Etuarimãko mã mokaro imehnõ
neponãmary ekahmananomo.
Toto maro ytopyra ase, tynekarorykõ
etaparyhtao eya xine;
ineponãmarykõ oneahmara ase.
5 Omoro rokẽ mase ymõkomoryme,
Ritonõpo Jesemy, omise jahtao ise jehtoh ya ekarõko mase, jesemary ae jarõko mase.
6 Kure rokẽ jyrĩko mase!
Onekarory kurã poko tãkye rokẽ ase,
osenuruhkãko ase!
7 Ritonõpo, oeahmãko ase Jesẽme oexiryke.
Jamorepaneme mase zae jehtoh poko,
koko josenetupuhtoh ekarõko mase ya.
8 Ynara zuaro ase: Ritonõpo ymaro
exikehpyra ehtoh waro ase.
Ameke pyra mana, emero rokẽ toehse ahtao,
enaromyra ase.
9 Morara exiryke tãkye ase osenetupuhnõko opoko.
Orihketyme ro jahtao, torẽtyke pyra ase,
oenetuputyryke ya.
10 Oya, Ritonõpo, towomase jexiryke
jurumekara mase aorihtyã esao jahtao.
Onymenekahpyry kurã onymotanohpopyra mase.
11 Oya, isene exiketõ esemary poko
tutuarõtanohpose ywy.
Ymaro oexiry jãkyemãko mana,
yzamaro exikehpyra mana jũme.