113
Ritonõpo kure ehtoh eahmary poko
1 “Kure mase, Ritonõpo,” kahtoko!
Ritonõpo Kuesẽkõ eahmatoko, ipoetory tomo!
2 “Kure mase, Ritonõpo,” kakehpyra sehtone
seromaroro, jũme roropa rahkene!
3 Ẽmepyry poe ikohmamyry pona
ah Ritonõpo toahmasẽme nexino!
4 Imeimehnõ nonory põkõ emero esẽme
Ritonõpo mana;
tuisamehxo aexiry kapu tõ epoe mana.
5 Imepỹ pyra mana Ritonõpo Kuesẽkõ panono,
esary kae mana kapu ao.
6 Yrome epuĩko mana kapu enetohme, nono roropa.
7 Tymõkomokãkara anỹnõko mana toto
ehxirotopõpyry winoino,
omise exiketõ anỹnõko mana toto etuarimatoh poe;
8 tuisa poenõ epeme toto rĩko mana,
typoetory tõ tuisary epeme.
9 Nohpo, emũkuapỹ ãkyemapõko mana
imehxo tytapyĩ tao, tãkye mokyro ripõko mana,
imũkuru tõ ekarõko eya mana.
“Kure mase, Ritonõpo,” kahtoko!