Ki jiin kpanbar nba ki Yennu gannɔ na po
1Bee ki niib lorin mɔyêtuk lora?
2Bee ki niib lorin lora nba kaa nyɔɔti?
Ki bi kpanbara nan bi yudamm lorin lorbiit
ki jiin Yennu nan daanɔ nba ki u gannɔ na po,
3ki yeen a, “Ŋaant tin nyinn ti mɔŋ bi nuu ni.
Ti nyinn ti mɔŋ bi yent ni.”
4Yennu kar u naan binbintir paak yendɔuŋ ni,
ŋaan laab nan bi lorkpeena maŋ.
5U dia wutoore ki teemm kpaanii,
ki jii parbiir ki jek bi gbanu.
6U yet a, “N kasii kunkonn Sayɔnn paake ki n dinn n kpanbar.”
7Ŋanne ki kpanbar na yet a, “N saa mɔɔnt linba ki Yennu pake.
U pakin a, ‘Fine tee n bija, ki dinnae ki n teen a baa.
8Boimin ki man tura digbana na kur,
tingbouŋ na kur sii tee a yare.
9A saa jii kutgbianue ki yeerib,
ki but butib nan boba na.’ ”
10Gbiintir man, yimm kpanbara,
jiin linba na ki tumii yan man,
yimm tingbouŋ na kpanbara:
11Ii jiantir Yennu nan jaŋmaanii,
12ki gbaan jiantɔ nan gbananjekiruk.
Nna-i kaa, u wutoor saa doe yiama ki yin kpo.
Parmaasir be daansiab nba baat Yennu boor
a wun nyinnib ninbɔŋ ni na paak.