1Ki n guur Yennu sommir po soon nna,

ki u gbiint ki gbat n mɔnii,

2ki dat nyinnin daŋ bootuk ni, ki bia nyinnin bakir nba sumii ni,

ki tɔɔnin tanpiiuk paak, ki te ki n set siaminba ŋan;

3ki u wannin ki n yin yanpaaŋ, dontir yaŋ nba teen ŋɔɔ Yennu.

Niib bonchiann saa la nna ki lii tee kpaanii,

ki bi saa teen Yennu yada.

4Damm nba teen Yennu yada, ki tee binba ki jiantir pata,

koo ki ki pukin tingbann jiantdamm po na, parpeenn tee bi yare.

5Ti Yomdaanɔ Yennu, a tun bona bonchiann ki turit;

sɔɔ ki be ki tee nan fin na. A lor lorŋana bonchiann ki jiin ti po.

N kan fit kan li kur, li yab bonchiann.

6A ki loon maruŋ nan piinii,

a ki boi bonkobit mujoonu maruŋ po,

koo maruŋ nba saa nyinn biit po,

ŋaan a turin tubae a man gbiint a mɔmaan.

7Ki n toon ki yet a, “Mine na. N baara.

A kpaanii nba ki a teenin na be sennu gbouŋ ni.

8Yennu, n loon man tun a loomm,

ki a sennu be n par ni.”

9Yennu, a niib kur tintaanu niŋe,

ki n pak a barŋanii nba jiin faa tinnit na po.

A mi nan n kan fit nyik li paku.

10N ki woon a tinnu maan na n par ni.

N tun piak a barmɔnii binbeŋ nan a sommir poe.

N ki ŋmin nan mɔmaan na paku, a niib kur tintaanu ni,

ki piak a lomm nan barmɔnii nba tee biaŋinba.

11Yennu, n mi nan a kan nyik a ninbatinu nanimi,

ŋaant ki a lomm nan barmɔnii-ii guun yoo kur.

12Fara bonchiann lintima, li yab ki kaa kann.

N yanbɔmm kɔɔnin fara niwa, ki n ji ki laat,

li yab ki gar yut nba be n yur paaka,

li te ki n ji ki mɔk parcheenn.

13Yennu, tintin, baat yian ki tan sommin.

14Ŋaant niib nba kur kpaanin a bin kpin na,

bin di fei ki lin bia ŋmatib;

ŋaant binba mɔk parpeenn n baak po na, bin ŋmat ki di fei.

15Ŋaant ki binba kur laan na, lin bakitib bi baak ni.

16Ŋaant ki binba kur baat a boor-ii mɔk parpeenn kii kpamm.

Ŋaant ki binba kur mɔk niipoturu a tinnu paak-ii tun kii yeen a,

17Yennu, n tee nibutiŋe ki tee tarik, ŋaan a ki tamm n po.

Fine tee n tinntɔɔ ki tee n Yennu.

Baat yian ki tan sommin.