Ki jiin Yennu baakir po
1Sanpaak want Yennu baakir nba tee biaŋinbae;
ki sanpagbant mɔɔntir u nii nba ŋamm linba.
2Daar kur mɔɔntir ki teen daar nba waae,
nyiɔk n tuu nyiɔk want Yennu bannu nba tee-e.
3Ki mɔmaan ki piak, ki kunkɔsiar bia ki yeen,
4ŋaan ki mɔmaan nyi ki saa durinya kur po,
ki sɔɔ kur gbia tingbouŋ na kur po.
Yennu ŋamm binbeboor sanpagbouŋ ni ki tur yonnu;
5ki u nyi sanyiɔk ni,
ki naan nan pooyookir sɔrɔ nba mɔk parpeenn na,
ki bia tee nan nantatinnɔ nba teen siir a wun tin na,
6ki nyi sanpaapo chian yeŋ po, ki tuu puur ki saan leer po.
Siar kaa ki saa fit bɔr nyi li yekitu ni.
Ki jiin Yennu sennu na po
7Yennu sennu ŋan, ki teen panpaaŋ.
Yennu wannue tee barmɔnii,
ki teen damm nba pɔt yan na subinii.
8Yennu senniie tee barmɔnii,
ki binba sakir mɔk parpeenn.
Yennu wannu ŋan, ki teen nirɔ bannu.
9Li ŋan ki tin baak Yennu,
ki lii tee nna mɔkmɔk nan mɔkmɔk.
Yennu sennii ŋan ki took yoo kur,
10ki mɔk niɔŋ ki gar salima,
ki man chee siat nba tuu be sagbent ni na.
11Ki min nba tee a daabir na, ki li teenin bannu.
Ki n mɔk mɔsaku ki laat nyɔɔt li paak.
12Sɔɔ kaa ki saa fit bann u biit.
Yennu, nyikin chab n biit nba ki n ki mi li po.
13Dɔkint min a daabir, ki min nyi garuk yanbɔmm ni.
A daa te ki n yanbɔmm diinin, ki n sii fit be fanu,
ki nyi yanbɔntoona ni.
14Yennu, ŋaant ki n mɔmaan nan n dudukit-ii man a po.
Fine tee n sindandiiuk nan n tinntɔɔ.