1Li poor po ki Job yaat u mɔb, ki sat mɔtont ki jiin daar nba ki bi din marɔ na po. 2U din yet a:

3Yennu, a te mɔtont-ii be daar nba ki bi din marin na paak, ki te mɔtont-ii be nyiɔk nba ki bi din soor n poor na paak. 4Yennu, lebitir li daar ki teenir bunbɔnn, ki ji daa ban tian daar maŋ po, ki ji daa ban te yentu yentir li paaki. 5A teen li daar ki lii tee bunbɔncheenn, ki dɔkinir nan sanpagbouŋ, ki lin piin yonnu, 6ki nyinn nyiɔk maŋ li binn ni, ki ji daa te ki bi ban kaaniri. 7A teenir nyɔyann ki li daa be parpeenn ni. 8A te jabaabuura n sat mɔtont daar maŋ paak, ŋamme mi nyun ni bonsusoouk nba ki bi yiu Lefiatann na dianu. 9Soot sanyafaar ŋmaajar na ki u daa yentir; ki daa te ki li nyiɔk mɔk dindann nan sanyiɔk yentu. 10A te mɔtont-ii be nyiɔk maŋ paak, nan waa te ki bi marin u ni, ki te daamii nan parbiir dɔkit n paak na.

11N sunman ki n din bo kpo n naa poor niwa, koo ki n din kpo baa marin yoo nba na. 12Bee teen ki n naa din dian u taapaaki? Bee teen ki u din mɔɔntin u biimi? 13Li-i tee ki n din bo kpoie, n ji bo foie mɔtana man, 14ki ji bo sii gɔɔnt nan kpanbara nan doodiara nba din ŋamm maa yaayoo ni naan ŋei na. 15Ki n ji bo sii gɔɔnt nan tɔɔndamm nba tuu gbeen bi ŋei nan salimmɔna nan salimpeena na, 16koo ki gɔɔnt nan bik nba ki bi tuu marɔ kpeent na. 17Kaat niŋewa ki nitont na tuu nyik bi toonbiit, ki jab nba tun bak na tuu tan la foon. 18Leŋe ki dansarkɔɔra gbaa laat parmaasir, ki foi nan tintantii nan mukir sennii. 19Ki sɔɔ kur be nni, binba tee nijaana nan tarii, ki daaba kur be bi yamani leŋ.

20Bee ki a te niib be ninbaatiri? Bee ki a teen niib nba be parbiir ni na yentu? 21Bi guu kuume, ŋaan ki li ki baatib. Bi mantik loon kaauko ki gar mɔkint kur. 22Bi ki mɔk parpeenni, see bi tan kpo ki bi piib. 23Yennu-e bɔrin bi tɔɔnn po binbeŋ, ki ŋaan ki bi be mabir ni, lokir kur po. 24Maa sii di jeet na, ki n be mɔnii paak, ki kan fit nyik kukura. 25Ki linba kur ki n tiinir jaŋmaanii, li jijekit n tan teen barmɔnii, 26ki n ki laat parmaasir, ki bia ki laat foon, ki n daamii ki mɔk gbennu.