1Ki n por kat nan n kan ban got sapaamɔ ki n niɔŋ n kɔɔu.

2Yabint Yennu yaa wun tun bee ki turiti? U yaa wun pa ki jiin nisaarik nlee, u toona paaki? 3Yennu te ki parbiir nan biiru baat damm nba tuun toonbiit nae. 4Yennu mi linba kur ki n tuun, u laat taaŋmaatir nba kur ki n ŋmaan.

5N por nan n ki ban tun bonbiiri, n bia ki ban bikin maa n kpann n leebi. 6Ŋaant Yennu n bikinin, bonbikinkar nba ŋan paak, ki u saa la nan n ki tun bonkpetiri. 7Ki mi-i tun ki kpetiie, koo ki te toonbiit soorin, koo ki n nii tarin jakintie, 8ŋann ki a ŋaan ki n jeet n biir, koo ki a ŋaan siab n di jeet nba ki n bur na.

9Li-i tee ki n niɔŋ ban kɔɔ n lɔɔ ŋaapoo ni, ki n bɔr guu-u u diiuk tammɔb ni, 10ŋann ki a ŋaan ki n ŋaapoo n kpant sɔɔ yɔɔ, kii biaki dɔɔ jalɔɔ gado paak. 11Kuume sii tee tubdatu, li toonbibooru paak. 12Li toonbibooru tee muu nba di ki boontire, ki li saa di linba kur ki n mɔk.

13Li-i tee ki n toontunna na yenɔ baar nan bunburimii n boor, n tuu gbiinte ki diau fanu. 14Li-i tee ki n ki tun nna, nlee ki n saa fit baar Yennu boori? Yennu-i taŋi baar yoo nba a wun bu n buuti, n saa yet a bee? 15Yennu nba turin manfoor na, li Yennu-e bia tur n toontunna manfoor.

16N ki ban yêt ki ki somm nandammi, n bia ki ban te ki pakɔi be parbiir ni, 17koo ki te kpeebii lin kon, ŋaan ki min di. 18Laa nyii n bisin niŋa, n tuu diabe fanu.

19Ki yoo nba ki n la sɔɔ be talas ni, ki namii, ki kan fit daa lianti, 20n tuu turɔ liant nba ki bi luur nan pekobit nba nyii n pelook nie, ki wun ji pakin nan u par kur.

21Ki li-i tee ki n ban ŋmab kpeebik, ŋaan mi nan n tan saa di u mɔnii buut boori, 22ŋann n kpinkpant n kɔnn, ki tukit nyi n bɔpiat ni. 23N kan ban tun li toonbiit booru, kimaan n tiin Yennu tubdatu jaŋmaanii.

24Ki li-i tee ki n tuu maa salima paak, koo ki yet salima maŋ a, “Fine tee n fat-tɔɔ,” 25koo ki piak dont n mɔŋ, n mɔkint na paaki, 26koo ki ban jiant yonnu, u yentu na paaki, koo ki jiant ŋmaarik u ŋant na paaki, 27a lin te ki n par n chɔrimm, koo ki turib baakiri, 28ŋann yanbɔnboorik na tubdatu-ii tee kuun; kimaan maa yêt Yabint Yennu weiu na paak.

29Li ki ban manin yoo nba ki n datai be daamii ni, koo ki li manin yoo nba ki biiru baaribi. 30N ki ban miar Yennu a bin kpo-o. 31Ki jab nba kur tuun n boor na mi nan n tun gaan saamme. 32N tun gaan sɔngatae n ŋaak ni, ki ki saak bi dɔɔ sɔnjot ni.

33Jasiab koor a bin bɔr bi yanbɔmme, ŋaan min ki ban dɔkin n yari. 34Min ki tiin jaŋmaanii nan niib nba saa yet linba. N tuu ki ŋmin, koo ki loo diloor kimaan bi sukit paaki.

35Sɔɔ kan gbiint maa yeen linba na-a? N pora nan mɔbona nba kur ki n yeen na tee barmɔniie. Ŋaant Yabint Yennu n gat turin.

Li-i tee linba kur ki n biirtɔɔ saa pak ki biirin na bo sɔb siar paak, ki n bo saa lar, 36n bo saa barir n bɔpiɔk paak nan parbifaant, ki bo yirir n yur paak nan fokirik nae. 37N saa yet Yennu-e linba kur ki n tun, ki gonn n yur sanpaapo kii be u tɔɔnn.

38Li-i tee ki n jan tiŋ nba ki n ko naie, koo ki fat bondaanɔ boori, 39li-i tee ki n dii jeet nba bur li ni naie, ŋaan te kpaara nba bur na kpenn komi, 40ŋann a te mɔtont nan kunkonii n pia leŋ, ki daa tee jeet kaa.

Job mɔmaan kure na.