1Ŋaan mɔtana, jab nba ki n kperib na laame. Bi baanba mantik tuu ki mɔk nyɔɔt, li paake ki n tuu kan te bin somm n bɔi ki bin kpakir pei. 2Bi tuu tee jakpera nba mantik baŋ, ki kan fit tun toonsiar ki turime. 3Bi mantik tuu tee nandamme, ki kon waab, ki bi ŋman jiin koona nyiɔk, muuk ni, kunkoouk paak. 4Bi tuu ŋab tutubirae ki ŋman kunkoouk paak, mantik gbetnaatunn jiina nba ki man na. 5Ki sɔɔ kur beerib nan hootii, ki li tee nan bi hoot nanyukiie na. 6Ki bi ji kɔɔ tanfiat ni, bootii nba ki bi gbiir jɔɔt loka ni na. 7Ki bi be muuk na ni, ki beet nan bonkobit na, ki taan leeb tiiuk na ni, 8ki tee nan niib nba ki mɔk yan ki kaa nyɔɔt na, ki bi ber nyinnib tiŋ na ni.

9Mɔtana ki bi ji baat ki laan, ki n ki tee siar, ŋaan tee nilaakir bi boor, 10ki bi sarikitin, ki dukii nan bi mantik ŋan ki garime, ki lek baat ki siin mɔsant n numpo. 11Kimaan Yennu nba te ki n baŋ ki ki mɔk paŋ na, ki bi ŋmat n paak nan wutobiir. 12Ki niib maŋ lekin nan paŋ, ki te ki n ŋmat poor, ki bi koor a bin kpin, 13ki gɔɔr maa saa bot siaminba po, ŋaan koor a bin biirin; ki sɔɔ kaa ki saa gɔɔrib. 14Ki bi lekin loka kur po, ki baat ki tan do n yur paaka; 15ki jaŋmaanii soorin; ki n baakir bot nan wamaasin na, ki n mɔkint gar nan sanpagbouŋ na.

16Mɔtana, n ji yaa man kpoe na, ki weriku kaa n daamii po, 17ki n kpaba chɔɔn nyiɔk kur, ki n gbanant nba junt nan tont na ki maakit. 18Ki Yennu soorin, liatir turu ni, ki ŋmakir n liant ki li tor tor. 19Ki u lun bakir ni, ki n ji tee nan tant na.

20Yennu, mi-i yiina, ŋaan a ki gat jiintin; ki mi-i bia kii miara yoo nba, a ki fiin n po. 21Ki a ŋmaŋitin nan daamii; ki diinin nan a paŋ kur. 22A te wouŋ pebirin, ki te wonpaaruk na lianin. 23N mi nan a jikitin ki saa nanin kuun boore, siaminba tee sɔɔ kur kunkunboor na. 24Bee ki a lekin jabutiŋi? ki u tee daanɔ nba kan fit tun siar, see wun miar ninbatinu po. 25N tuu ki mɔ sommit niib nba be daamii ni, ki bia mɔk ninbatinu nan talas dammi-i? 26N daan parpeenn nan yentu poe, ŋaan ki parbiir nan bunbɔnn ji baatin. 27Ki daamii nan gbananyekitir mantik gbatin, ki daar n tuu daar, ki n be daamii ni. 28Ki n be bunbɔncheenn ni, ki ki laat yonnu yentu; ki see niwor ni, ki mei sommir po. 29Ki n piak nan parbiir kunkɔr, ki li mɔnii tee nan mɔbɔk, koo naamiɔŋ nba mɔ biaŋinba na. 30Ki n gbanant bɔnn, ki di muu nan gbanantouŋ. 31Siaminba ki n tuu gbia jinjeruk nan kpinkpammuk na, mɔtana n ji gbia fabinii nan mɔniie leŋ.