1Nisaarik binbeŋ tee nan ninmɔnn kunkɔnkɔnna toona nae, ki tee nan paŋ toonn na, 2ki bia tee nan daabir nba lin loon maasu boor na, ki tee nan toontunnɔ nba tuu guu a wun gaar paauk biaŋinba na. 3Ki ŋmaarik n tuu ŋmaarik, li ki mɔk linba paak te ki n be, ki nyiɔk n tuu nyiɔk, ki li teenin parbiir. 4Li-i tee ki n dɔɔr man gɔɔn yoo nba, sanyiɔk ki yentir yian, ki n labin nyiɔk na kur, ki guu lin yent. 5N gbanant gbee nan nanwubaae, ki pɔr narwaka, ki mɔt nyi nara na ni. 6Ki daa na saa ŋaan ki n ki mɔk dindann, ki saa yian yian nan pek pek na.

7Yennu, tiat nan n manfoor tenn waaminnae, ki n parpeenn poŋ gbenna. 8Bi laatin mɔtana, ŋaan ji kan ban lami. Li-i tee ki bi kpaanin, n sii kaa. 9-10Ki ti tee nan sanpagbouŋ nba tuu penn ki yant nae, ki nisaarik tuu kpo ki ji ki jenti, ki niib nba kur tuu miu na n ji tamm u po. 11Li paak, n kan fit ki ŋmini. N wutoor doo ki li tonin, see ki n pak.

12Bee ki a guumi? A dukii nan n tee nyun ni bonsusoouko-o? 13N dɔɔ tiŋ ni ki koor a man foi, ki loon fatu, a lin nyinnin gbananyekitir ni. 14Ŋaan fine jeentin nan damiit; ki te ki n laat yirintu, ki bia damii damibiit. 15Fi-i chek n turu, li chee nan n gbanant-ii be parbibooru na ni. 16N bak nan mii be n manfoor na niwa, n ji ki loon mii mɔk manfoori. Nyikimin. N binbeŋ ki mɔk nyɔsiati.

17Bia paake ki nisaarik kpaa talas ki tura ni? Bia paake ki a baka be waa tuun linba po? 18A fiitirɔ sanyiɔk ni kur, ki bia bikintɔ yoo kur. 19A kan paat a numm n paak, ki man fit nak mɔsanti-i? 20Mi-i tun yanbɔmmi, n tun bee ki biir fin dansarguurɔ? Bee ki a jiin ki teenin jabenni? N tee jikire ki be a paaki-i? 21A kan ban nyik n yanbɔmm ki chabimi-i? A kan tinin ninbaauk, maa tun kpet na paaki-i? Li kan wei ki n sii be kaauk ni ki tan sii kaa, yoo nba ki a kpaanin.