1Ki Elihu ŋamm yet a: 2Job, dimin sukuru waan, ki gbiint linba ki n yaa man pak Yennu taar ni na. 3N bannu yab, n yaa man jii maa mi linbae ki wann nan Yennu nba tee n naamii daanɔ na tuun linba ŋan. 4Maa beera linba na, siar kaa ki tee faaki. Faa laat min nba a tɔɔnn po na tee yandaanɔe nan barmɔnii.

5Yennu mantik mɔk paŋ halii, u ki yisin sɔɔ; siar kaa ki u ki bant li paak. 6U ki te ki toonbiit damm be mɔkmɔki, ŋaan u tuun linba ŋane ki teen nandamm. 7U guu binba tee popeenn damm; u teemm yaak, ki bi dia niib nan kpanbara nba dia na, ki bia te niib teemm chɔruŋ mɔkmɔk nan mɔkmɔk. 8Ŋaan li-i tee ki niib be baana ni, ki di fara, baa tun linba paaki, 9Yennu-e wantib bi toonbiit nan bi garit. 10U te ki bi gbiin u kpaanii, ki nyikin toonbiit tumu. 11Li-i tee ki bi mɔk mɔsaku nan Yennu, ki waau, bi sii be bi manfoor ni nan parmaasir, ki mɔkitir. 12Ŋaan li-i kii tee nna, bi tan saa kpoe yann ki saan kpeentiŋ.

13Binba ki mi Yennu na, bi wutoa yɔɔ doe, ki bi-i lekii la tubdatu gbaa, ŋaan bi ki mei Yennu sommir po. 14Bi kpenne, ŋaan daa paan, kimaan feie te ki bi kpet yiama. 15Ŋaan Yennu subint niib nan farae, ki dia wahala ki lootir bi tuba.

16Yennu-e nyinna daamii ni, ki te ki a la fat-n-mɔŋ a yamani; ki dokin jeet a dindiboor. 17Ŋaan mɔtana a la tubdatu nan laa jaŋa biaŋinbae. 18Ii mi ki daa te fobit piinii kpannani, koo ki mɔkint n ŋmanta ki a tan boti. 19Li tan kii mɔk nyɔɔt nan fii mɔ kii loon sommir; ki a paŋ na kur ji kan somma li yoo. 20A daa sun ki nyiɔk n baari, ki tee yoo nba ki digbana niib tan saa kpo na. 21Ii mi ki a tan saa mann tun toonbiit. Yennu tura wahala na, a lin gɔɔr ki nyinna toonbiit tumu nie.

22A tiar Yennu paŋ nba yab biaŋinba. Ŋɔɔe tee wanntɔɔ nba chee sɔɔ kur. 23Sɔɔ kaa ki saa yet Yennu waa saa tun linba, koo ki pak biirɔ nan u tun bonbiiri. 24U yɔɔ laat dontire nan toona nba ki u tuun, li ŋan ki a mun pak dontɔ. 25Sɔɔ kur la waa tun linbawa; ki ti sii fit be banfɔkira ŋaan lar. 26Ti kan fit mantik bann u yabint nba jaŋ biaŋinba, koo ki bann u bina kann nba tee biaŋinba.

27Yennu-e fɔɔn nyun tiŋ ni, ki te ki li kpantir saak. 28U te saak nyi sanpagbant ni ki baa, ki teen nisaarii. 29Sɔɔ ki mi sanpagbant na nba chari biaŋinba, koo biaŋinba ki satianii na nyi sanpagbant na ni, siaminba ki Yennu be na. 30U te sanyikintii yentir sanpagbouŋ na kur po, ŋaan ki nyun tiŋ po tee bunbɔnn. 31Yennu nba teen niib jeet biaŋinbae na, ki teen jeet ki li yab ki kaa bannu. 32U tuu kub sanyikintii na u nuu nie, ki tuu tan te lin yek jabenn na. 33Satianii na tuu mɔɔnt wouŋ baaru poe, ki bonkobit gbaa mi u baaru po.