1Ki Job jiin a: 2N mi nan linba na tee barmɔniie, ŋaan nisaarik saa teen nlee kii be fanu Yennu tɔɔnni? 3Nlee ki nirɔ saa fit nɔi nanɔ mɔniɔku? U saa fit boi buboit tusir, ki sɔɔ kan fit jiin li siar. 4Yennu mantik sub, ki bia mɔk paŋ; ki nisaarik kan fit tookɔ. 5Ki u chari jɔjaana ŋaan ki ki beerib, ki biirib nan u wutoor. 6Yennu-e te ki tiŋ jekin, ki ŋakin jaantarii nba dia tingbouŋ na. 7U saa fit gɔɔr yonnu ki u kan do, ki bia gɔɔr ŋmaabira ki bi kan yent nyiɔk. 8Sɔɔ ki somm Yennu ki u lat sanpagbanti, koo ki sommɔ ki u ŋmaat nyun ni bonsusoouk paaki. 9Ŋɔɔe nan ŋmaabira ki jɔnn sanpaapo, ki nan ŋmaabira nba ki bi yib Wouŋ nan Bɔk na, ki bia nan ŋmaalore, nan naanyuŋmaarik, nan ŋmaabira nba be niidiitu po na. 10Ti kan fit bann toonjaana nba ki u tuun na paak, ki u bakitnauŋ toona ki mɔk terik.

11Yennu-i gaar n boor, ŋaan n kan fit lau. 12U jikit waa loon linbae, ki sɔɔ kan fit gɔɔrɔ, ki bia ki fit boiɔ a, “A tuun bee na?” 13Yennu wutoor-i doo, li ki maakit, ki biir u datai nba sommit nyun ni bonsusoouk Rahab ki u ki saak u mɔb. 14Li paak, n saa la mɔbona lee, ki tur Yennu gatu? 15N ki tuun biiti, ŋaan maa saa tun linba tee ki man miar Yennu, wunba tee n buut daanɔ na, ninbatinu poe. 16Li-i tee ki u te ki n pak n maan lek, ŋaan n kan teen yada nan u saa gbiint ki turimi. 17U tuun wonpaaruk, ki li fibitin, ki teenin daŋ, ŋaan ki li ki mɔk paak nan waama.

18U kan te man foi, ki gbeen n binbeŋ nan tont. 19N saa fit mab ŋɔɔ Yennu-u? N jiiu ki saan nanɔ buut boori-i? Sɔɔ saa fit te ki wun saana-a? 20N ki biir siari, ki tee nimɔnɔ, ŋaan n mɔbona nyi ki tee nan n biir nae, ki linba kur ki n pak, ki li biirin. 21-22N ki biir siari. N baka kaa linba tuunin na; ki n manfoor benu ni ki man turin. Li ki daamii; taa biir koo taa ki biiri, Yennu saa boontita. 23Niŋanɔ-i kpir kpo, Yennu tuu laae. 24Yennu-e jii durinya na ki tur toonbiit damm. Ŋɔɔe te ki barbuura na jɔɔn. Ki li-i kii tee Yennu-i kaa teeni, ŋmee teeni?

25N daa na baate yian yian, ki li yenn kɔɔ gbaa ki ŋani. 26N manfoor tiine yian yian nan burgbetir nba mantik tiin na, ki saa yian yian nan baakir nba tuu laan a wun soor weŋ na. 27-28Ki mi-i laa mɔmiin, ki koor a man tamm n gbanantont na po yoo nba, n daamii na kur tuu jen ki jeentime. N mi nan Yennu-e bu n buut ki biirin. 29Waa poŋ bu ki biirima na, bia paake ki li sii daamiimi? 30Cheeb kaa ki saa fit wuur n yanbɔmmi. 31Yennu-e lun bootuk nba mɔk jakint ni, ki n liant gbaa tiinin fei. 32Yennu-i bonii tee nisaarik, n bo saa turɔ gatuwa; ki ti bo saa jii leeb ki saan buut boor, ki saa pak ti kɔnn po. 33Ŋaan sɔɔ kaa ki saa set ti sinsuuk ni; sɔɔ kaa ki saa bu min nan Yennu maami. 34Yennu, nyikin ki daa daar n tubiri. Nyintin yanputuk ni. 35N ki tiin jaŋmaanii. N yaa man pake, kimaan n mi n mɔŋ par ni.