1Ki Job piin ki ŋamii piak a: 2N sunman ki n binbeŋ na bo saa ŋmat ki tee nan Yennu nba din guun biaŋinba nae. 3Yennu din yɔɔ be nanin, ki teenin yentu, yoo nba ki n somm bunbɔnn ni na. 4Li din tee sakir nba ni ki n mɔkitire, ki Yennu yɔɔkit nanin, ki tee piisin n ŋaak paak, 5ki Yabint Yennu be nanin li yoo, ki n waas kur be n boor ki lintin. 6Ki nei nan buunii teenin biin bonchiann, ki n kpan tiinii pia nan tana niŋa. 7Yoo nba kur ki doo na saakab lakin, ki n saa maa n kar bi sinsuuk ni; 8naasinpaauŋ na tuu fiir chate yoo nba ki bi lan, ki jakpera na n fiir set, ki li want nan bi chɔrimin. 9Niib na tɔɔndamm tuu ŋmin fuute; 10binba tee nijaana na mɔŋ tuu ŋmine.

11Ki binba kur lan, koo ki gbat n labaari, bi tuu piak linba ŋane ki jiin maa tun linba po. 12Nandamm na-i mɔ yoo nba, n tuu sommibe, ki bia sommit kpeebii nba ki mɔk sommteeb. 13Ki jab nba mantik be ninbaatir ni na piakin, ki n sommit pakɔi ki bi laat fat-n-mɔŋ. 14Ki n be popeenn binbeŋ kur, 15ki tee jɔɔnii ninbinn, ki bia tee wɔbii taa. 16N daan tee nan kpeebii baa nae, ki nyint saamm daamii ni, 17ki biir nitont yiikoo, ki fiar binba ki bi diimm na ki nyintib bi nuu ni, 18ki yɔɔ dukii nan man wei n manfoor ni, ki tan kpo n ŋaak ni nan pardɔɔnn. 19N daan tuu tee nan tiik nba jiina be nyun ni nae, ki bia tee nan tiik nba yiinii mei nan marin na. 20Ki sɔɔ kur piak ki dontirin, ki n mɔk paŋ yoo kur. 21Ki mi-i taŋi kpaan kpaanii yoo nba, niib tuu ŋmine, ŋaan gbiint linba ki n piak na fanu. 22Ki mi-i pak gbenni, ki bi ki mɔk siar ki pukii li paaki. 23Ki n mɔbona na maant bi para nan biaŋinba ki kpaara tuu la saak kpafuur yoo, ki bi para mei na. 24Ki n tuu laa mɔmiin, yoo nba ki bi kɔɔ birisuk ni, ki n maanunyeeŋ na chekintib. 25Ki n be bi tɔɔnn ki teemm ŋmakita, ki gar bi tɔɔnn nan kpanbar nba tuu gar u kunkɔnkɔnna tɔɔnn biaŋinba na, ki maant bi para yoo nba ki bi be parbiir ni.